ہمارے سیاسی مخالفین آج مکافات عمل کا شکار ہیں، اسپیکر ایاز صادق

کوئٹہ(ڈیلی گرین گوادر)اسپیکر قومی اسمبلی سردار ایاز صادق نے کہا ہے کہ جو عناصر ملک کو تباہی کی جانب لے گئے، آج وہ خود مکافاتِ عمل کا سامنا کررہے ہیں۔لاہور کے علاقے لکھو ڈیر میں ترقیاتی منصوبوں کے افتتاح کے موقع پر میڈیا سے گفتگو کرتے ہوئے انہوں نے کہاکہ 2017 میں نواز شریف کی حکومت کو ایک منظم سازش کے تحت ہٹایا گیا، اور یہی اقدام ملکی ترقی کے سفر کو روکنے کا سبب بنا۔اُن کا کہنا تھا کہ 2017 سے 2023 کے درمیان پاکستان کو آگے بڑھنے کے بجائے پیچھے کی جانب دھکیلا گیا، اور وہ اعلیٰ عدلیہ کے سربراہ جو خود کو ناقابلِ احتساب سمجھتے تھے، آج کوئی اُن کا تذکرہ تک نہیں کرتا۔ایاز صادق کا کہنا تھا کہ وزیراعظم شہباز شریف قومی ترقی اور عوامی فلاح کے لیے شب و روز محنت کررہے ہیں۔انہوں نے کہا کہ 2018 میں بیگم کلثوم نواز کے خلاف نازیبا زبان استعمال کی گئی، اور ہماری قیادت کو مذاق کا نشانہ بنایا گیا، لیکن آج وہی عناصر مکافات عمل کا شکار ہیں۔
انہوں نے الزام لگایا کہ پی ٹی آئی کی حکومت نے آئی ایم ایف سے کیے گئے وعدے پورے نہ کرکے معیشت کو سنگین نقصان پہنچایا، جب کہ ن لیگ کی قیادت نے سخت فیصلے لے کر ملک کو دیوالیہ ہونے سے بچایا۔ ایاز صادق کے مطابق موجودہ انتخابات کے بعد پاکستان دوبارہ ترقی کی راہ پر گامزن ہو چکا ہے۔