’’پہلے پنجاب اسمبلی توڑنے کا فیصلہ، ‘‘ دوسرے مرحلے میں خیبرپختونخوا اسمبلی تحلیل ہوگی عمران خان

راولپنڈی: پاکستان تحریک انصاف کے چیرمین عمران خان کی زیر صدارت تحریک انصاف راولپنڈی کے ارکان صوبائی و قومی اسمبلی کا اجلاس ہوا۔ اجلاس میں ڈپٹی اسپیکر پنجاب اسمبلی واثق قیوم عباسی، صداقت عباسی، شیخ راشد شفیق اور صوبائی وزیر راجہ بشارت سمیت دیگر نے شرکت کی۔اجلاس میں ملکی سیاسی صورتحال، تحریک انصاف کی سیاسی حکمتِ عملی اور آئندہ کے اہداف پر تفصیلی تبادلۂ خیال کیا گیا۔ اجلاس میں فیصلہ کیا گیا کہ پہلے مرحلے میں پنجاب اسمبلی تحلیل کی جائے گی۔ پی ٹی آئی سے تعلق رکھنے والے تمام ارکان قومی اسمبلی دوبارہ ایوان میں پیش ہوکر اپنے استعفے دیں گے۔ اجلاس میں تحریک انصاف کی ملک بھر میں جاری احتجاجی تحریک کو انتخابی مہم میں تبدیل کرنے کا بھی فیصلہ کیا گیا ہے۔ دوسرے مرحلے میں خیبرپختونخوا اسمبلی تحلیل ہوگی۔ راولپنڈی سے تعلق رکھنے والے تمام ارکان نے پنجاب اسمبلی کی تحلیل اور قومی اسمبلی سے دوبارہ استعفوں کے فیصلے کی توثیق کر دی۔ اراکین اسمبلی نے کہا کہ قومی و صوبائی اسمبلی کی نشستیں پی ٹی آئی کی امانت ہیں۔ عمران خان نے کہا کہ معاشی اور سیاسی بحران سے نکلنے کا واحد راستہ جلد شفاف انتخابات ہیں۔