کوئٹہ (ڈیلی گرین گوادر) پشتونخوا نیشنل عوامی پارٹی کے جاری کردہ پریس ریلیز میں کہا گیا ہے کہ ژوب سے نیشنل ڈیموکریٹک موومنٹ کے آرگنائزر عدنان شالیزئی کی گزشتہ رات سے لاپتگی نہایت تشویشناک، افسوسناک اور قابلِ مذمت ہے۔ بیان میں اس واقعے پر گہری تشویش کا اظہار کرتے ہوئے کہا گیا کہ کسی بھی سیاسی کارکن کا اس طرح اچانک لاپتہ ہونا نہ صرف بنیادی انسانی حقوق کی سنگین خلاف ورزی ہے بلکہ جمہوری اقدار کے بھی سراسر منافی ہے۔ پریس ریلیز میں مزید کہا گیا کہ سیاسی کارکنوں کے نام فورتھ شیڈول میں شامل کرنا اور ان پر 3 ایم پی او جیسے غیر قانونی اور غیر آئینی قوانین کا اطلاق کرنا دراصل سیاسی آزادیوں کو سلب کرنے اور اختلافِ رائے کو دبانے کی ایک منظم کوشش ہے، جو کسی بھی مہذب اور جمہوری معاشرے میں ہرگز قابلِ قبول نہیں۔ بیان میں واضح کیا گیا کہ حق و انصاف کی آواز بلند کرنے والوں کو جبری طور پر خاموش کرانے کے ایسے ہتھکنڈے عوامی شعور کو دبا نہیں سکتے بلکہ اس سے عوام میں مزید بے چینی اور اضطراب پیدا ہوتا ہے۔ پارٹی نے اپنے بیان میں کہا کہ آوازِ حق کو دبانا جمہوری اقدار، انسانی حقوق اور آئینی آزادیوں کی کھلی خلاف ورزی ہے۔ پشتونخوا نیشنل عوامی پارٹی اس افسوسناک واقعے کی شدید الفاظ میں مذمت کرتے ہوئے متعلقہ اداروں سے پرزور مطالبہ کرتی ہے کہ عدنان شالیزئی کو فوری اور بحفاظت بازیاب کیا جائے اور ان کی گمشدگی میں ملوث تمام عناصر کو قانون کے کٹہرے میں لایا جائے تاکہ انصاف کے تقاضے پورے ہو سکیں۔ بیان میں اس امر پر بھی زور دیا گیا کہ جبری گمشدگیاں نہ صرف ایک سنگین انسانی مسئلہ ہیں بلکہ یہ معاشرے میں خوف و ہراس، عدم تحفظ اور بے اعتمادی کو فروغ دیتی ہیں، جس کے منفی اثرات پورے معاشرے پر مرتب ہوتے ہیں۔ ایسے اقدامات ریاست اور عوام کے درمیان فاصلے بڑھاتے ہیں اور جمہوری نظام کو کمزور کرتے ہیں۔ پریس ریلیز میں مزید کہا گیا کہ سیاسی اختلافِ رائے کو طاقت اور جبر کے ذریعے دبانے کے بجائے آئینی، قانونی اور جمہوری طریقہ کار کے تحت حل کیا جانا چاہیے۔ ایک مہذب ریاست کی پہچان یہی ہے کہ وہ اپنے شہریوں کے بنیادی حقوق کا تحفظ کرے اور اختلافِ رائے کو برداشت کرے۔ آخر میں پشتونخوا نیشنل عوامی پارٹی نے تمام جمہوری قوتوں، انسانی حقوق کی تنظیموں، وکلاء برادری، سول سوسائٹی اور باشعور عوام سے اپیل کی کہ وہ جبری گمشدگیوں کے خلاف مشترکہ اور مؤثر آواز بلند کریں اور عدنان شالیزئی سمیت تمام لاپتہ افراد کی فوری اور بحفاظت بازیابی کے لیے اپنا بھرپور کردار ادا کریں۔ پارٹی نے اس عزم کا اعادہ کیا کہ وہ ہر فورم پر انسانی حقوق کے تحفظ اور جمہوری اقدار کے فروغ کے لیے اپنی جدوجہد جاری رکھے گی۔
کسی بھی سیاسی کارکن کا اچانک لاپتہ ہونا بنیادی انسانی حقوق کی سنگین خلاف ورزی ہے : پشتونخوا نیشنل عوامی پارٹی

ٹیگز:
پشتونخوا نیشنل
