پی ٹی آئی میں بغاوت ہوچکی، وقت آگیا اس فراڈ سے چھٹکارا حاصل کیا جائے ، احسن اقبال

اسلام آباد:پاکستان مسلم لیگ نون کے رہنما احسن اقبال نے میڈیا سے گفتگو کرتے ہوئے کہا کہ آزادانہ اور منصفانہ انتخابات کی راہ ہموار کریں گے، وزیراعظم بیرونی ہاتھ ملوث ہونے کے الزامات نہ لگائیں ثبوت دیں، قوم کو بیرونی ہاتھوں کے بارے میں بتائیں، سپریم کورٹ میں ریفرنس دائر کریں احسن اقبال نے کہا ہے کہ پی ٹی آئی میں بغاوت ہوچکی، حکومت اس لئے فوری اجلاس نہیں بلانا چاہتی، دو روز میں قومی اسمبلی کا اجلاس بلائیں، دودھ کا دودھ پانی کاپانی ہو جائے گا۔ انہوں نے کہا کہ تمام ہتھکنڈوں پر غور کر رکھا ہے جو حکومت ممکنہ طور پر آزماسکتی ہے، اسپیکر نے عدم اعتماد کیلئے قانون کے مطابق ایوان کی کارروائی نہ چلائی تو اس کے نتائج کا سامنا کرنا پڑےگا، اسپیکر کو غیرجانبداری سے فرائض منصبی انجام دینے چاہیں، اسپیکر اگر عمران خان کے جیالے بننا چاہتے ہیں تو مراد سعید کیساتھ کرسی پر بیٹھ کر مہم چلائیں۔احسن اقبال کا کہنا تھا کہ جو بھی گروہ یا رکن حکومت کیلئے آکسیجن بنے گا وہ عوامی غیض و غضب کا سامناکرے گا، وقت آگیا اس فراڈ سے چھٹکارا حاصل کیا جائے۔