آزاد جموں و کشمیر میں تعمیراتی شعبے کے مسائل و چیلنجز پر مشاورتی اجلاس

مظفرآباد (ڈیلی گرین گوادر) انجینئر وسیم نذیر نے مظفرآباد کا دورہ کیا اور تعمیراتی شعبے کے اسٹیک ہولڈرز کے ساتھ ایک تاریخی مشاورتی اجلاس کی صدارت کی۔ یہ اپنی نوعیت کا پہلا اجلاس تھا جس میں کسی چیئرمین پی ای سی نے آزاد جموں و کشمیر کے کنسٹرکٹرز سے براہِ راست ملاقات کی۔ اس اجلاس میں علاقے بھر سے نامور کنسٹرکٹرز کی بڑی تعداد نے شرکت کی۔شرکائے اجلاس نے چیئرمین پی ای سی کا پرتپاک خیر مقدم کیا اور اس بات پر شکریہ ادا کیا کہ انہوں نے اپنے مظفرآباد کے دورے کا آغاز کنسٹرکٹرز سے ملاقات کے ساتھ کیا تاکہ ان کے مسائل کو سنا اور حل کیا جا سکے۔اجلاس کے دوران تعمیراتی شعبے کو درپیش اہم مسائل اجاگر کیے گئے، جن میں پی ای سی پرائس ایڈجسٹمنٹ فارمولے پر عمل درآمد نہ ہونا، پی پی آر اے بڈنگ ڈاکومنٹس اور پی ای سی اسٹینڈرڈ بڈنگ ڈاکومنٹس کے استعمال میں پیدا ہونے والا ابہام، لوکل گورنمنٹ اینڈ رورل ڈویلپمنٹ (ایل جی اینڈ آر ڈی) کے چھوٹے منصوبوں میں پبلک ورکس ڈیپارٹمنٹ (پی ڈبلیو ڈی) کی مداخلت، انجینئر نہ ہونے والے سیکریٹریز کی تعیناتی جس سے انجینئرنگ کے کام کے معیار کو نقصان پہنچ رہا ہے، پی ای سی آزاد جموں و کشمیر ان رولمنٹ سب کمیٹی کی عدم تشکیل، پی ای سی گورننگ باڈی میں آزاد جموں و کشمیر کی نمائندگی کا نہ ہونا اور چیف انجینئرز کے اختیارات کو بیوروکریٹک و غیر تکنیکی اداروں کو منتقل کر کے محدود کرنا شامل ہیں۔اپنے خطاب میں چیئرمین پی ای سی انجینئر وسیم نذیر نے کنسٹرکٹرز کا شکریہ ادا کیا اور یقین دلایا کہ بڈنگ ڈاکومنٹس سے متعلق مسئلہ ایک ماہ کے اندر پی پی آر اے کے ساتھ خوش اسلوبی سے حل کر لیا جائے گا۔ انہوں نے اس عزم کا اعادہ کیا کہ پی ای سی بطور انجینئرنگ کے پیشے کا واحد ریگولیٹر، کنسٹرکٹرز اور انجینئرنگ کمیونٹی کے وسیع تر مفادات کے تحفظ کے لیے پرعزم ہے۔چیئرمین نے یاد دلایا کہ عہدہ سنبھالنے کے بعد ستمبر 2024 میں پی ای سی نے پہلی بار تھری سییز (کنسٹرکٹرز، کنسلٹنٹس اور کلائنٹس) کا مشاورتی ورکشاپ اسلام آباد میں منعقد کیا۔ انہوں نے اعلان کیا کہ اسی نوعیت کا ایک مشاورتی ورکشاپ جلد مظفرآباد میں بھی منعقد کیا جائے گا تاکہ اسٹیک ہولڈرز کی شراکت کو مزید مضبوط بنایا جا سکے اور آزاد جموں و کشمیر کے مخصوص مسائل کو حل کیا جا سکے۔ مزید برآں انہوں نے بتایا کہ پی ای سی آزاد جموں و کشمیر برانچ آفس کو مزید فعال اور مضبوط کیا جا رہا ہے تاکہ تمام اسٹیک ہولڈرز کو بہتر سہولیات فراہم کی جا سکیں۔اجلاس کے اختتام پر چیئرمین پی ای سی نے آزاد جموں و کشمیر کے انجینئرز اور کنسٹرکٹرز کو مکمل تعاون کی یقین دہانی کروائی اور کہا کہ انجینئرنگ کے پیشے اور تعمیراتی شعبے کو درپیش تمام مسائل کے حل کے لیے ہر ممکن کوشش کی جائے گی