قطر فرار کی کوشش ناکام، اشتہاری ملزم کو ایف آئی اے نے دھر لیا

کراچی (ڈیلی گرین گوادر) ایف آئی اے امیگریشن حکام نے کراچی میں ایک اہم کارروائی کے دوران اغوا اور قتل جیسے سنگین جرائم میں مطلوب اشتہاری ملزم انیق خان کی بیرون ملک فرار کی کوشش ناکام بنادی۔ملزم انیق خان، جو آزاد کشمیر کے ضلع کوٹلی کا رہائشی ہے، قطر فرار ہونے کی کوشش میں کراچی انٹرنیشنل ائیرپورٹ پر پکڑا گیا۔ ملزم آزاد کشمیر پولیس کو ایک حالیہ مقدمے میں مطلوب تھا، جس میں اس پر قتل اوراغوا کی دفعات کے تحت سنگین الزامات عائد کیے گئے ہیں۔ایف آئی اے حکام کے مطابق ملزم کا نام پہلے سے اسٹاپ لسٹ میں شامل تھا، جس کی بنیاد پر فوری کارروائی عمل میں لائی گئی۔ گرفتاری کے بعد انیق خان کو تمام قانونی تقاضے مکمل کرتے ہوئے آزاد کشمیر پولیس کے حوالے کر دیا گیا ہے۔ترجمان ایف آئی اے کے مطابق ایف آئی اے امیگریشن بیرون ملک فرار ہونے کی کوشش کرنے والے ملزمان پر کڑی نظر رکھے ہوئے ہے اور قانون کی بالادستی یقینی بنانے کے لیے ہر ممکن اقدام جاری رکھے گا۔