کراچی میں مختلف ٹریفک حادثات میں طالبہ سمیت4 افراد جاں بحق ہوگئے

کراچی میں تین مختلف ٹریفک حادثات میں ایک طالبہ سمیت 4 افراد جاں بحق ہوگئے، چاروں افراد موٹر سائیکل سوار تھے۔

پہلا حادثہ کراچی کے علاقے کورنگی انڈسٹریل ایریا میں پیش آیا جہاں موٹرسائیکل سوار دو بھائی کمپنی جارہے تھے کہ تیز رفتار بس نے ٹکر مار دی، حادثے میں دونوں بھائی موقع پر ہی جاں بحق ہوگئے جب کہ ڈرائیور بس چھوڑ کر فرار ہوگیا۔

پولیس نے بس کنڈکٹر کو حراست میں لے لیا اور بس کوبھی اپنے قبضے میں لےلیا۔
دوسرے حادثہ ایکسپو سینٹر کے قریب پیش آیا جہاں طالبہ اپنے والد کے ساتھ موٹر سائیکل پر یونیورسٹی جارہی تھی کہ بریک لگنے پر طالبہ موٹرسائیکل سے نیچےگری تو پیچھے سے آنے والے واٹر ٹینکر نے لڑکی کو روند ڈالا۔

ٹینکر ڈرائیور موقع سے فرار ہوگیا جب کہ پولیس نے ٹینکر کو اپنے قبضے میں لےلیا ہے۔تیسرا حادثہ یونیورسٹی روڈ پر پیش آیا، جہاں ڈاؤ یونیورسٹی کی بس نے موٹرسائیکل کو ٹکر ماری جس سے نوجوان جاں بحق ہوگیا، پولیس نے بس کو قبضے میں لے لیا ہے۔

پولیس کے مطابق موٹرسائیکل سوار کو پہلےکار نے ٹکر ماری جس سے وہ گرا تو پیچھے آنے والی بس نے نوجوان کوروندھ دیا،کار کے ڈرائیور کو حراست میں لےکرکار قبضے میں لے لی گئی ہے جب کہ بس ڈرائیور بس چھوڑ کر فرار ہوگیا۔