راولپنڈی(ڈیلی گرین گوادر) شمالی وزیرستان میں سیکیورٹی فورسز کی مختلف کارروائیوں کے دوران 16 خوارج ہلاک ہوگئے جبکہ دو بہادر جوانوں نے جام شہادت نوش کیا۔
پاک فوج کے شعبہ تعلقات عامہ (آئی ایس پی آر) کے مطابق خیبرپختونخوا کے ضلع شمالی وزیرستان کے علاقوں میر علی، دتہ خیل اور گردونواح میں انٹیلی جنس بنیادوں پر کارروائیاں کی گئیں۔ گزشتہ 12 گھنٹوں کے دوران سیکیورٹی فورسز اور خوارج کے درمیان شدید فائرنگ کا تبادلہ ہوا۔آئی ایس پی آر کے مطابق علی خیل میں 12 خوارج مارے گئے، جن میں بھارتی سرپرستی میں سرگرم فتنۃ الخوارج سے تعلق رکھنے والے 2 افغان شہری بھی شامل ہیں، جبکہ میر علی اور دتہ خیل میں 2، 2 خوارج ہلاک ہوئے۔
ترجمان پاک فوج کے مطابق ان جھڑپوں میں 43 سالہ حوالدار عصمت علی (ضلع صوابی کے رہائشی) اور 32 سالہ نائیک آفتاب علی (ضلع مردان کے رہائشی) بہادری سے لڑتے ہوئے شہید ہوگئے۔آئی ایس پی آر کے مطابق ہلاک خوارج سے اسلحہ اور گولہ بارود بھی برآمد کیا گیا، ہلاک دہشت گرد معصوم شہریوں کے قتل سمیت متعدد دہشت گردانہ کارروائیوں میں ملوث تھے۔
ترجمان پاک فوج کا کہنا ہے کہ ان علاقوں میں موجود دیگر خوارج کے خاتمے کے لیے کلیئرنس آپریشنز جاری رہیں گے۔آئی ایس پی آر کے مطابق ملک سے بیرونی سرپرستی میں ہونے والی دہشت گردی کے خاتمے کے لیے سیکیورٹی فورسز اور قانون نافذ کرنے والے اداروں کی کارروائیاں عزمِ استحکام کے تحت پوری رفتار سے جاری رہیں گی، جوانوں کی یہ قربانیاں دہشت گردی کے خلاف قومی عزم کو مزید مضبوط کرتی ہیں۔
