کھلی کچہری کا مقصد عوامی مسائل کو فوری طور پر حل کرنا ہے،نوابزادہ میر زرین خان مگسی

اوتھل (ڈیلی گرین گوادر) پارلیمانی سیکریٹری برائے سیاحت و ثقافت بلوچستان، نوابزادہ میر زرین خان مگسی نے ضلع لسبیلہ کے ہیڈکوارٹر اوتھل میں سرکٹ ہاؤس کے مقام پر ایک کھلی کچہری کا انعقاد کیا، جس میں مختلف محکموں کے اعلیٰ افسران، ضلعی انتظامیہ اور بڑی تعداد میں شہریوں نے شرکت کی۔اس موقع پر شہریوں نے اپنے مسائل براہ راست نوابزادہ میر زرین خان مگسی اور متعلقہ محکموں کے افسران کے سامنے پیش کیے، جن میں تعلیم، صحت، انفراسٹرکچر، پانی کی فراہمی، صفائی، اور امن و امان کے مسائل شامل تھے۔نوابزادہ میر زرین خان مگسی نے خطاب کرتے ہوئے کہا کہ کھلی کچہری کا مقصد عوامی مسائل کو فوری طور پر حل کرنا اور عوام کو حکومتی اداروں تک براہ راست رسائی فراہم کرنا ہے۔ انہوں نے تمام محکموں کے افسران کو ہدایت کی کہ وہ عوام کے مسائل کو ترجیحی بنیادوں پر حل کریں اور دفاتر میں اپنی حاضری کو یقینی بنائیں تاکہ شہری بلا جھجھک اپنے مسائل بیان کر سکیں۔ڈپٹی کمشنر لسبیلہ حمیرا بلوچ نے کہا کہ ضلعی انتظامیہ محدود وسائل کے باوجود عوامی مسائل کے حل کے لیے کوشاں ہے۔ انہوں نے شہریوں کو یقین دلایا کہ ان کے مسائل کو سنجیدگی سے لیا جائے گا اور ان کے حل کے لیے تمام ممکنہ اقدامات کیے جائیں گے۔ایس ایس پی لسبیلہ، عاطف امیر نے امن و امان کی صورتحال پر روشنی ڈالتے ہوئے کہا کہ پولیس نے حالیہ دنوں میں منشیات، قتل اور ڈکیتی کے متعدد مقدمات میں کامیاب کارروائیاں کی ہیں۔ انہوں نے بیلہ میں ٹیکسی ڈرائیور کے قتل اور غلام نبی رونجھو کے قتل کے مقدمات میں ملزمان کی گرفتاریوں کی تفصیلات بھی فراہم کیں۔کھلی کچہری میں جام گروپ کے رہنماؤں، مختلف محکموں کے افسران اور شہریوں کی بڑی تعداد نے شرکت کی۔ شہریوں نے اس اقدام کو سراہتے ہوئے کہا کہ اس سے عوامی مسائل کے حل میں مدد ملے گی اور عوام کا حکومتی اداروں پر اعتماد بحال ہوگا۔نوابزادہ میر زرین خان مگسی نے اس عزم کا اظہار کیا کہ وہ لسبیلہ کے عوام کے مسائل کو حل کرنے کے لیے ہر ممکن کوشش کریں گے اور جہاں ضرورت ہو، صوبائی حکومت سے بھی رابطہ کیا جائے گا۔ انہوں نے کہا کہ عوامی خدمت ان کی اولین ترجیح ہے اور وہ اس مشن کو جاری رکھیں گے۔