مذاکرات پر یقین رکھتے ہیں،دروازے بند نہیں کیے ،بیرسٹر گوہر

اسلام آباد(ڈیلی گرین گوادر) رہنما پی ٹی آئی بیرسٹر گوہر نے کہا ہےکہ ہم مذاکرات پر یقین رکھتے ہیں، بات چیت کے دروازے بند نہیں کیے۔

رہنما پی ٹی آئی بیرسٹر گوہر نے میڈیا سے گفتگو کرتے ہوئے کہا کہ دہشتگردی ایک سیریس مسئلہ ہے، نہیں چاہتے کہ ملک میں کسی قسم کی دہشتگردی ہو۔انہوں نے کہا کہ ہم مذاکرات پر یقین رکھتے ہیں، ہم نے مذاکرات کے دروازے بند نہیں کیے، لیکن حکومت کے ساتھ کس بات پر مذاکرات کریں؟ پارلیمان میں بات کرتے ہیں تو مائیک بند کردیئے جاتے ہیں۔

بیرسٹر گوہر کا کہنا تھا کہ ہم کوشش کرتے ہیں برف پگھلے اور آگے بڑھیں، لیکن حکومتی اقدامات ہمیں دوراہے پر لے جارہے ہیں، ہماری کوشش ہے پارلیمان میں بات کرکے آگے بڑھیں، بانی پی ٹی آئی سے ملنے آتے ہیں تو بھی قدغن لگایا جاتا ہے، ایسے حالات میں چلنا مشکل ہے لیکن اگلے ہفتے دیکھتے ہیں یہ کیا کرتے ہیں۔

رہنما پی ٹی آئی کا کہنا تھا کہ آج اڈیالہ جیل میں القادر ٹرسٹ کی سماعت تھی، جج صاحب آئے ہوئے تھے،ابھی تک 6گواہوں کی پروسیڈنگ مکمل ہوچکی ہے، آج باقی وکلا کی طرح ہماری بانی پی ٹی آئی سے ملاقات ہوئی ہے ان کی طبیعت ٹھیک ہے۔انہوں نے مزید کہا کہ موجودہ کابینہ میں بھی نگران سیٹ اپ کے ہی لوگ لائے گئے ہیں۔