کوئٹہ(ڈیلی گرین گوادر)سابق وفاقی وزیر زوبیدہ جلال نے افواج پاکستان اور قانون نافذ کرنے والے اداروں کے ساتھ مکمل یکجہتی کا اظہار کرتے ہوئے کہا ہے کہ پاکستانی قوم دہشت گردی کے خلاف جنگ اور کسی بھی بیرونی خطرے کے خلاف متحد ہے۔میڈیا سے بات کرتے ہوئے انہوں نے کہا کہ ہمیں اپنی مسلح افواج پر فخر ہے کہ انہوں نے دہشت گردوں کو ان کے ٹھکانوں سے کامیابی کے ساتھ نکال باہر کیا اور خطے میں دہشت گردی کی لعنت کو جڑ سے اکھاڑ پھینکا جس سے ملک میں امن کی مکمل بحالی کی راہ ہموار ہوئی، جو کہ معاشی ترقی کی پیشگی شرط ہے۔
زوبیدہ جلال نے مسلح افواج کی قربانیوں کی مختلف مختصر کہانیوں کو کامیابی سے منعقد کرنے اور ہائبرڈ جنگ کے چیلنجوں سے نمٹنے کے لئے زبردست کردار ادا کرنے پر آئی ایس پی آر کو سلام پیش کیا۔ انہوں نے کہا کہ مسلح افواج کی قربانیوں کے قومی معیشت پر مثبت اثرات مرتب ہوں گے اور مختلف شعبوں میں ایک بار پھر غیر ملکی سرمایہ کاروں کی آمد شروع ہو گی، امن و امان کی بحالی کے بعد اب معیشت میں بہتری آنی چاہیے۔
زبیدہ جلال نے تجویز دی کہامریکہ کو خطے میں زمینی حقائق کے حوالے سے حقیقت پسندانہ رویہ اپنانا چاہیے اور دہشت گردی کے خلاف جنگ میں پاکستان کی قربانیوں اور پاکستان کی شمولیت کے بغیر افغانستان میں پائیدار امن ممکن نہیں۔ اسی طرح پاکستانی مصنوعات کو امریکی مارکیٹ تک ٹھوس رسائی ملنی چاہئے، ہم نے دہشت گردی کے نتیجے میں بہت بھاری نقصان اٹھایا۔
