بلوچستان کے مقامی میڈیا کے ساتھ بہتر تعلقات حکومت بلوچستان کا وژن ہے ،جان اچکزئی

کوئٹہ(ڈیلی گرین گوادر) نگراں صوبائی وزیر اطلاعات جان اچکزئی نے کہاہے کہ بلوچستان کے مقامی میڈیا کے ساتھ بہتر تعلقات حکومت بلوچستان کا وژن ہے،صوبے کے مقامی اخبارات اور ڈیجیٹل میڈیا عوام کی اصل آواز ہونے کیساتھ ساتھ حکومت اور عوام کے درمیان پل کا کردار ادار کررہے ہیں۔ان خیالات کا اظہار انہوں نے گزشتہ روز روزنامہ قدرت کوئٹہ کے دفتر کے دورے کے موقع پر کیا۔ جان اچکزئی نے روزنامہ قدرت کے مختلف سکیشنز کو دورہ کیا اور سٹاف و انتظامیہ سے گفتگو کی۔ اس موقع پر جان اچکزئی کو خصوصی طور پر ڈیلی قدرت ڈیجیٹل سیکشن کے کام اور نئے اقدامات بارے بریفنگ دی گئی‘ صوبائی وزیر نے روزنامہ قدرت ڈیجیٹل کو بلوچستان کی بہترین آواز قرار دیتے ہوئے کہا کہ ڈیلی ڈیجیٹل جس انداز میں کام کرکے بلوچستان کے عوام کی آواز دنیا تک پہنچاتا ہے وہ قابل تعریف ہے۔انہوں نے کہا کہ وزیر اعلیٰ بلوچستان میر علی مردان ڈومکی کی سربراہی میں حکومت بلوچستان کا وژن ہے کہ یہاں کے مقامی میڈیا کو پروموٹ کیا جائے۔جان اچکزئی نے بلوچستان کے اخبارات کے کردار کی تعریف کرتے ہوئے کہا کہ ماضی میں ہر قسم کے حالا ت میں جس انداز میں اخبارات نے حکومت بلوچستان کے موقف کو عوام تک پہنچایا اسکی مثال کہیں نہیں ملتی‘ انہوں نے کہا کہ بلوچستان حکومت اخبارات اور ڈیجیٹل میڈیا کو پروموٹ کرنے کیلئے ہر ممکن تعاون جاری رکھے گی۔