کراچی،بیوی سے جھگڑے پر شوہر نے اپنے 2 بچے سمندر میں ڈبو کر ماردیئے

کراچی(ڈیلی گرین گوادر)کراچی کے ساحلی علاقے منوڑہ کے قریب باپ نے بچوں کو سمندر میں پھینک دیا۔ پولیس نے جائے وقوع سے والد کو گرفتار کرلیا۔بدھ کی شام ایک شخص اور اس کے 2 بچوں کے ڈوبنے کی اطلاعات موصول ہوئی تھیں۔ڈوبنے والے شخص کو بچالیا گیا تھا جب کہ دونوں بچوں کی تلاش دوسرے روز بھی جاری رہی۔ ایدھی فاؤنڈیشن کے رضاکار سمندر میں ریسکیو آپریشن جاری رکھے ہوئے ہیں۔

ایس ایس پی کیماڑی فدا حسین جانوری نےبتایا کہ ملزم نے پہلے بچوں کو پانی میں ڈبو کر مارا اور پھر خود بھی اپنا خاتمہ کرنے کی کوشش کی لیکن وہاں موجود لوگوں نے اسے بچالیا۔فدا حسین جانوری کا کہنا تھا کہ بچے ڈبونے والے ظالم باپ کو حراست میں لے لیا گیا ہے۔پولیس کو دیئے گئے بیان میں ملزم کا کہنا ہے کہ اس کے بیوی سے تعلقات ٹھیک نہیں تھے، اس حوالے سے بیوی کے والدین اور بہن سے بھی بات کی لیکن ان کی جانب سے سرد مہری کا مظاہرہ کیا گیا۔

ملزم نے مزید بتایا کہ واقعے والے روز وہ اپنے بیٹوں کے ساتھ یہاں آیا تھا، اس وقت بھی اس نے بیوی سے بات کرنے کی کوشش کی لیکن تھک ہار کر سوچا کہ اپنی اور بچوں کی زندگی کا خاتمہ کرلوں۔ملزم نے مزید بتایا کہ اس نے اپنے بچے سمندر میں پھینکے، وہ نہیں ڈوبے تو اس نے خود بچوں کو ڈبویا، اس کے بعد اپنی زندگی کا خاتمہ کرنے کی کوشش کی لیکن بدقسمتی سے بچ گیا۔