بینظیر بھٹو ویمن کرائسس سینٹر کو فعال کرکے اسے تحفظ نسواں کا مثالی مرکز بنائیں گے،ربابہ خان بلیدی

کوئٹہ (ڈیلی گرین گوادر) وزیر اعلیٰ بلو چستان کی مشیر بر ائے ویمن ڈویلپمنٹ ڈیپارٹمنٹ ڈاکٹر ربابہ خان بلیدی نے کہا ہے کہ صوبائی دارالحکومت کوئٹہ میں قائم بینظیر بھٹو ویمن کرائسس سینٹر کو فعال کرکے اسے تحفظ نسواں کا مثالی مرکز بنائیں گے، ڈویڑنل اور ضلعی سطح پر ویمن کرائسس سینٹرز کا قیام اور فعالیت ضروری ہے تاکہ کسی بھی ناگہانی صورتحال کا شکار خواتین ہنگامی حالات میں تحفظ حاصل کرسکیں ان خیالات کا اظہار انہوں نے شہید بینظیر بھٹو ویمن کرائسس سینٹر کوئٹہ کے دورے کے موقع پر کیا اس موقع پر سینٹر کی مینجر روبینہ زہری نے ڈاکٹر ربابہ خان بلیدی کا استقبال کیا اور روایتی شال پہنا کر انہیں خوش آمدید کہا، دورے کے موقع پر مشیر ترقی نسواں کو بینظیر ویمن کرائسس سینٹر سے متعلق بریفنگ دی گئی۔ اس موقع پر افسران سے بات چیت کرتے ہوئے وزیر اعلٰی بلوچستان کی مشیر برائے ویمن ڈویلپمنٹ ڈیپارٹمنٹ نے کہا کہ بینظیر ویمن کرائسس سینٹر غیر معمولی حالات سے دوچارخواتین کو ہنگامی بنیادوں پر سہارا اور تحفظ فراہم کرنے کا مرکز ہے تاہم درپیش مسائل کی وجہ سے اس کی فعال خدمات کا دائرہ وسیع نہیں جس کی وجہ سے یہ بنیادی اہداف کے حصول میں نمایاں کارکردگی کا مظاہرہ نہیں کرپارہا، اس کرائسس سینٹر کے انتظامی اور مالی امور سے متعلق مسائل حل کئے جائیں گے تاہم کچھ امور میں قانون سازی کی ضرورت ہے متلعقہ اسٹیک ہولڈرز اور خواتین کے حقوق پر کام کرنے والی غیر سرکاری تنظیموں کی معاونت و رہنمائی اور مشاورت سے اس کرائسس سینٹر کو فعال کیا جائے گا اس کے ساتھ ساتھ بلوچستان کے ڈویڑنل اور ضلعی سطح پر فعال ویمن کرائسس سینٹرز قائم کئے جائیں گے تاکہ حالات کی ستائی خواتین کو فوری تحفظ فراہم کیا جاسکے، دورے کے اختتام پر بینظیر ویمن کرائسس سینٹر کی مینجر روبینہ زہری نے وزیر اعلٰی بلوچستان کی مشیر برائے ویمن ڈویلپمنٹ ڈیپارٹمنٹ ڈاکٹر ربابہ خان بلیدی کو سوئینر پیش کیا۔