الیکشن کی تاریخ کااعلان حلقہ بندیوں کے بعد کیا جائے گا ، مرتضیٰ سولنگی

اسلام آباد(ڈیلی گرین گوادر)الیکشن کی تاریخ کااعلان حلقہ بندیوں کے بعد کیا جائے گا ،آئندہ عام انتخابات جنوری کے آخر میں ہوں گے۔

نگراں وفاقی وزیر اطلاعات و نشریات مرتضیٰ سولنگی نے یہ بات ریڈیو پاکستان کے خبروں اور حالات حاضرہ کے پروگرام میں گفتگو کرتے ہوئے کہی۔

الیکشن کمیشن آف پاکستان کا حوالہ دیتے ہوئے وزیر نے کہا کہ انتخابی حلقوں کی حتمی فہرست آئندہ 30 تاریخ کو طے کی جائے گی اور اسی وقت انتخابات کی تاریخ کا اعلان کیا جائے گا۔

الیکشن ایکٹ 2017 میں واضح طور پر درج ہے کہ تمام جماعتوں کو انتخابی مہم کے لیے کم از کم 54 دن کا وقت دیا جائے گا جو کہ تقریباً دو ماہ کا ہے اس لیے امید ہے کہ انتخابات جنوری کے آخر میں ہوں گے۔

الیکشن کمیشن آف پاکستان (ای سی پی) نے پہلے اعلان کیا تھا کہ عام انتخابات جنوری 2024 کے آخری ہفتے میں ہوں گے۔