راولپنڈی، گیس لیکیج سے دھماکا، ایک شخص جاں بحق

راولپنڈی(ڈیلی گرین گوادر) گیس لیکیج کے باعث دھماکے سے مکان کا کچھ حصہ گر گیا، ملبے تلے دب کر ایک شخص جاں بحق ہوگیا، 7 زخمیوں کو ملبے سے نکال کر اسپتال منتقل کردیا گیا۔ریسکیو ترجمان کے مطابق راولپنڈی کے علاقے پیپلز کالونی کے ایک مکان میں گیس لیکیج کے باعث دھماکا ہوگیا، جس کے بعد گھر کا کچھ حصہ بھی زمین بوس ہوگیا۔مکان کے ملبے تلے خواتین اور بچوں سمیت 8 افراد دب گئے، واقعے کے بعد پولیس کی بھاری نفری اور امدادی ٹیمیں بھی علاقے میں پہنچ گئیں۔ریسکیو ترجمان کے مطابق واقعے میں زخمی ہونیوالوں میں 2 بچے، 2 خواتین اور 4 مرد شامل ہیں۔ریسکیو ٹیموں نے طویل محنت کے بعد 8 افراد کو زخمی حالت میں ملبے سے نکال کر اسپتال منتقل کیا تاہم ایک شخص دوران علاج زخموں کی تاب نہ لاتے ہوئے چل بسا۔واضح رہے کہ گزشتہ روز بھی راولپنڈی میں گیس لیکیج سے ایک گھر میں دھماکا ہوا تھا، واقعے میں تین کمسن بہن بھائی جاں بحق اور ماں اور ایک بیٹی زخمی ہوگئے تھے۔