شاہراہِ دستور پر مسنگ پرسنز کے لواحقین آئے تھے ان ججوں کو ان بچوں کی آواز سنائی نہیں دے رہی تھی ، سردار اختر جان مینگل

اسلام آباد (ڈیلی گرین گوادر) بلوچستان نیشنل پارٹی کے سربراہ سردار اختر جان مینگل نے پاکستان میں کشیدہ حالات کی ذمہ داری سیاستدانوں سمیت، عدلیہ اور ملٹری و سول اسٹیبلشمنٹ پر عائد کرتے ہوئے فیکٹ فائنڈنگ کمیشن بنانے کا مطالبہ کیا ہے، جبکہ وفاقی وزیر منصوبہ بندی احسن اقبال نے چیف جسٹس کے خلاف سپریم جوڈیشل کونسل کو ریفرنس بھیجوانے کی تجویز دیدی۔ پیر کے روزپارلیمنٹ کے مشترکہ اسمبلی اجلاس میں اظہار خیال کرتے ہوئے بی این پی کے سربراہ اختر مینگل نے کہا کہ اس ملک میں جو واقعات ہورہے ہیں، سوچنا یہ ہے کہ یہ ہوا کیسے ہم سب سروں پر ہاتھ رکھ کر یہ گانا گا رہے ہیں کہ یہ کیا ہوا کیسے ہوا اور کب ہوا۔ انہوں نے کہا کہ اپنے استعمال کے لئے بلائیں پیدا کی گئی پھر ان بلاو¿ں کے کبھی سر پر اور کبھی پاو¿ں پر پیر رکھ دیا گیا اور جنہوں نے یہ بلائیں بنائی ہے ان سے پوچھنے والا کوئی نہیں۔ انہوں نے کہا کہ یہ بلائیں بنانے والے وردی میں بھی ہوں گے اور شیروانی میں بھی ہوں گے مگر اس تمام تر صورتحال کے ذمہ دار ہم سب ہیں صرف ایک ادارہ اس کا ذمہ دار نہیں ہے۔ انہوں نے کہا کہ آج کے حالات دیکھ کر ہنسنا تو ہمارا بھی حق بنتا ہے جن حالات کی نشاندہی ہم پچاس ساٹھ سال پہلے کرتے تھے اس وقت سب ہم پر ہنستے تھے اور اس وقت آپ ہم پر غداری کی تہمت لگاتے تھے۔ انہوں نے کہا کہ ملک کی آبادی کے ساتھ ساتھ آپ کے غداروں کی تعداد بھی بڑھتی جا رہی ہے صرف عدلیہ نے نہیں اس پارلیمنٹ نے بھی دوہرا معیار اپنایا ہوا ہے ہمارے اکابرین کو جیل میں رکھا گیا اسی شاہراہِ دستور پر بلوچستان سے مسنگ پرسنز کے لواحقین آئے تھے ان ججوں کو ان بچوں کی آواز سنائی نہیں دے رہی تھی ان کو تو کسی بھی جج نے جاکر تسلی نہیں دی جبکہ عمران خان کو تو ایک گھنٹے میں پیش کرنے کا حکم دیا گیا۔ انہوں نے کہا کہ لاہور میں تو ائیر گن چلانے سے پہلے سوچتے ہیں کہ یہ ہمارا بھائی ہے کیا بلوچستان والے آپ کے بھائی نہیں ہیں ہماری جھونپڑیاں اور کچے مکانات تک نہیں بخشے گئے آج انصاف کا معیار یہ ہے کہ کسی کو کہا جاتا ہے کہ گڈ ٹوسی یو اور کسی کو پھانسی کے پھندے پر چڑھا دیا جاتا ہے۔ انہوں نے کہا کہ قوم پرستوں نے کراچی میں احتجاج کیا کوئی انصاف نہیں ملا اسی طرح ایم کیو ایم کے لوگ اٹھائے گئے مگر بازیاب نہیں ہوئے جبکہ انہیں مرسڈیز میں لایا جائے گا اور گیسٹ ہاوس میں رکھا جائے گا۔ انہوں نے کہا کہ میں نے کہا تھا ایک فیک فائنڈنگ کمیشن بنایا جائے ہم سب اب ذمہ دار ہیں اور قربانیاں دینی پڑیں گی پچاس ججز، پچاس سیاستدان اور پچاس جرنیلوں کو سرعام لٹکایا جائے۔ اختر مینگل نے کہا کہ آج لہجوں سے ایسا لگ رہا ہے کہ ہم اپوزیشن میں ہیں کیونکہ صورتحال ایسی ہے آج حالات اس نہج تک پہنچے تو وہ کیسے پہنچے؟ یہ صورت حال ایک دن کی پیداوار نہیں ہے، یہ کیا ہوا؟ کیسے ہوایہ کئی دہائیوں سے پیدا کردہ صورتحال ہے مختلف اوقات میں اڑدھا پیدا کئے گئے جب وہ حد کراس کر گئے تو پھر دم پر یا سر پر پیر رکھا گیا۔