آئی ایم ایف نےکہا ہے توانائی کا شعبہ چلالیں یا پھر ملک، وزیر مملکت برائے خزانہ

اسلام آباد (ڈیلی گرین گوادر) وزیر مملکت برائے خزانہ عائشہ غوث پاشا کا کہنا ہے کہ آئی ایم ایف نےکہا ہے توانائی کا شعبہ چلالیں یا پھر ملک۔پارلیمنٹ ہاؤس اسلام آباد میں میڈیا سے گفتگو کے دوران عائشہ غوث پاشا نے کہا کہ پاکستان نے آئی ایم ایف کی پیشگی شرائط پر بہت تیزی سے عمل درآمد کیا ہے، آئی ایم ایف سے اسٹاف لیول معاہدہ جلد ہو جائے گا۔عائشہ غوث پاشا کا کہنا تھا کہ آئی ایم ایف نے ہم سے کچھ وضاحتیں طلب کیں، آئی ایم ایف کے ساتھ اضافی معلومات کا تبادلہ ہو چکا ہے، آئی ایم ایف کے ساتھ آج شام بھی ورچوئل مذاکرات ہوں گے۔

وزیر مملکت برائے خزانہ نے کہا کہ بیرونی فنانسنگ کیلئے دوست ممالک سے بات چیت چل رہی ہے، چین سے قرض رول اوور ہونے کی بات چیت چل رہی ہے، سعودی عرب اور یو اے ای سے بات چیت میں بھی پیش رفت ہورہی ہے۔اس سے قبل سینیٹ کی قائمہ کمیٹی برائے خزانہ میں عائشہ غوث پاشا کا کہنا تھا کہ پاکستان میں سبسڈی دینےکا کلچر بہت پرانا چلا آرہا ہے، اس کلچر کو ختم کرنےکی ضرورت ہے، یہاں بجلی اور گیس مہنگی پیدا کرکے سستی بیچنے کا کلچر ہے، آئی ایم ایف نےکہا کہ پاور سیکٹر چلالیں یا پھر ملک چلالیں۔