گوادریونیورسٹی نے بلوچستان کی دو یونیورسٹیوں کے ساتھ مفاہمت کی یادداشتوں پر دستخط کر دئے
کوئٹہ(ڈیلی گرین گوادر) گوادر یونیورسٹی نے تربت یونیورسٹی اور لسبیلہ یونیورسٹی آف ایگریکلچر، واٹر اینڈ میرین سائنسز کے ساتھ مفاہمتی یاداشتوں پر دستخط کردئے۔تقریب ایچ ای سی کے کوئٹہ سینٹر میں منعقد ہوئی۔ گوادر یونیورسٹی کے وائس چانسلر پروفیسر ڈاکٹر عبدالرزاق صابر نے پروفیسر ڈاکٹر دوست محمد بلوچ وائس چانسلر لسبیلہ یونیورسٹی اوتھل اور پروفیسر ڈاکٹر جان محمد وائس چانسلر تربت یونیورسٹی کے ساتھ مفاہمتی یاداشتوں پر دستخط کئے۔ گوادر یونیورسٹی کا تربت یونیورسٹی اور لسبیلہ یونیورسٹی کے درمیان مشترکہ تحقیقی سرگرمیوں، تحقیق کے لئے فیکلٹی ممبران کے تبادلے، لیکچر کا اہتمام، مباحثے، مطالعہ اور تحقیق کے لئے طلبہ کے تبادلے اور دونوں یونیورسٹیوں کے طلبہ کے لئے تعلیمی مواقع کو فروغ دینے کے لئے مفاہمت کی یادداشتوں پر دستخط کئے گئے۔ اس موقع پر ڈاکٹر جلال فیض، پرو وائس چانسلر لسبیلہ یونیورسٹی اور دیگر حکام بھی موجود تھے۔
