جیکب آباد میں گیسٹرو کی تباہ کاریاں جاری، مزید دو بچے جاں بحق

جیکب آباد(ڈیلی گرین گوادر) جیکب آباد میں گیسٹرو کی تباہ کاریاں جاری، ٹھل میں مزید دو معصوم بھائی گیسٹرو کی وجہ سے فوت ہوگئے۔ تفصیلات کے مطابق جیکب آباد میں حالیہ بارشوں اور سیلاب کے بعد ضلع بھر میں گیسٹرو کی وباءتیزی سے پھیل رہی ہے گزشتہ روز جیکب آباد کی تحصیل ٹھل کے نواحی گاوں دین گڑھ میں بارش متاثر نور محمد کھوسو کے دو معصوم بیٹے 3 سالہ یاسر کھوسو اور 1 سال کا عبدالخالق گیسٹرو میں مبتلا ہوکر فوت ہوچکے ہیں، واضح رہے کہ تحصیل ٹھل میں گیسٹرو کی وجہ سے دو روز کے دوران 6 معصوم بچوں سمیت 7 لوگ جاں بحق ہوچکے ہیں، گیسٹرو کی وجہ سے ہونے والی اموات پر محکمہ صحت کی جانب سے کوئی نوٹس نہیں لیا جارہا جس کی وجہ سے مزید اموات کا خدشہ ظاہر کیا جارہا ہے، ضلع جیکب آباد میں اس وقت سینکڑوں بچے گیسٹرو میں مبتلا ہوچکے ہیں۔