بجٹ میں مختلف وزارتوں کیلئے ترقیاتی فنڈز میں کمی کا امکان

اسلام آباد(ڈیلی گرین گوادر) آئندہ مالی سال مختلف وزارتوں کے لیے ترقیاتی فنڈز میں کمی کیے جانے کا امکان ہے۔وفاقی بجٹ 23-2022 میں حکومت کو مشکل معاشی حالات کا سامنا رہے گا اور آئندہ مالی سال مختلف وزارتوں کے لیے ترقیاتی فنڈز میں کمی کیے جانے کا امکان ہے۔وفاقی بجٹ 23-2022 میں ترقیاتی بجٹ کا حجم بھی کم کیا جائے گا۔

ذرائع کے مطابق مالی سال 23-2022 میں ترقیاتی بجٹ 700 ارب روپے رکھے جانے کا امکان ہے جبکہ رواں مالی سال ترقیاتی بجٹ کا حجم 900 ارب روپے رکھا گیا تھا۔ ترقیاتی بجٹ آئندہ مالی سال میں رواں مالی سال کے مقابلے میں 22 فیصد کم ہو گا۔آئندہ مالی سال میں پاور ڈویژن کے لیے 50 ارب روپے رکھے جانے کی تجویز ہے اور نیشنل ہائی وے اتھارٹی کے لیے آئندہ بجٹ میں 120 ارب روپے رکھے جانے کی تجویز دی گئی ہے۔ آئندہ مالی سال میں این ایچ اے کا بجٹ رواں بجٹ کے مقابلے میں 6 ارب روپے کم ہو گا۔

ذرائع کے مطابق ضم شدہ اضلاع کی ترقیاتی اسکیموں کے لیے 40 ارب روپے تجویز کیے گئے ہیں اور ضم شدہ اضلاع کے لیے رواں مالی سال کے مقابلے میں 14 ارب روپے کی کمی ہو گی۔ ہایئر ایجوکیشن کمیشن کے آئندہ مالی سال کے لیے 30 ارب روپے کی تجویز ہے جبکہ ہائیر ایجوکیشن کمیشن کے لیے آئندہ بجٹ میں اضافے کا امکان بھی ہے۔ وزیر اعظم کی جانب سے ایچ ای سی کے لیے بجٹ میں کٹوتی نہ کرنے کی ہدایت کی گئی ہے۔تجاویز کو حتمی منظوری اور مزید جائزے کے لیے پلان کوآرڈینشن کمیٹی میں پیش کیا جائے گا اور پلان کو آرڈینیشن کمیٹی کا اجلاس 4 جون کو طلب کیا گیا ہے۔