سپریم کورٹ کی کینٹین میں گیس سلنڈر دھماکے کا ایک زخمی دم توڑ گیا

ا سلام آباد (ڈیلی گرین گوادر) سپریم کورٹ کی بیسمنٹ کی کنٹین میں گیس سلنڈر کے دھماکے میں جھلسنے والا ایک زخمی دم توڑ گیا۔ دھماکے میں 12 افراد زخمی ہوئے تھے ،19 سالہ اسد منیب ولد تنویر احمد پمز اسپتال کے برن سینٹر میں ایڈمٹ تھا جو آج زخموں کی تاب نہ لاتے ہوئے چل بسا۔دھماکے سے کورٹ نمبر 6 بھی متاثر ہوئی تھی ، اس کے علاوہ کینیٹین میں فرنیچر کو بھی نقصان پہنچا ، بار ایسوسی ایشن کے استقبالیہ کے شیشے ٹوٹے تھے۔آئی جی اسلام آباد نے بتایا تھا کہ دھماکے میں 12 افراد زخمی ہوئے ، ایک اے سی ٹیکنیشن کا 80 فیصد جسم جھلس گیا ہے۔ آئی جی نے مزید کہا تھا کہ کینٹین میں کئی روز سے گیس کا لیکج ہو رہا تھا، اے سی کی مرمت کے دوران دھماکہ ہوا۔