ڈاکٹر حمیرا طارق کا خانہ فرہنگ ایران کویٹہ میں دورہ `مسلم امہ کے اتحاد اور غزہ میں اسرائیلی مظالم پر شدید تشویش کا اظہار

کوئٹہ(ڈیلی گرین گوادر) سیکرٹری جنرل حلقہ خواتین جماعت اسلامی پاکستان، ڈاکٹر حمیرا طارق نے کوئٹہ میں خانہ فرہنگ اسلامی جمہوریہ ایران میں ایک اہم میٹنگ میں شرکت کی۔ اس موقع پر انہوں نے دونوں اسلامی ممالک کے درمیان اخوت، یکجہتی اور خیرسگالی کے فروغ پر زور دیا۔اپنی گفتگو میں ڈاکٹر حمیرا طارق نے غزہ میں جاری اسرائیلی جارحیت، انسانی حقوق کی سنگین خلاف ورزیوں ،نہتے فلسطینیوں کی شہادتوں اور ایران میں اسرائیل کی دراندازی پر شدید تشویش کا اظہار کیا۔ انہوں نے کہا کہ اسرائیل کی جانب سے مسلط کردہ جنگ کو امریکہ کی آشیر باد حاصل ہے، جو عالمی ضمیر کے لیے لمحہ فکریہ ہے۔پروگرام کے بعد ایرانی نمائندگان کے ساتھ ہونے والی دو طرفہ ملاقات میں باہمی دلچسپی کے امور پر تبادلہ خیال کیا گیا اور مسلم دنیا کو درپیش چیلنجز سے نمٹنے کے لیے باہمی روابط کو مزید مضبوط کرنے پر اتفاق ہوا۔ڈاکٹر حمیرا طارق نے نومبر 2025 میں لاہور میں ہونے والے جماعت اسلامی پاکستان کے اجتماع عام میں شرکت کی خصوصی دعوت بھی دی، جسے ایرانی نمائندگان نے سراہا۔اس موقع پر ڈپٹی سیکرٹری و ڈائریکٹر میڈیا سیل حلقہ خواتین محترمہ ثمینہ سعید، ناظمہ صوبہ محترمہ شازیہ عبداللہ، اور جے آئی یوتھ کی خواتین ذمہ داران بھی شریک تھیں۔
ملاقات کے بعد ڈاکٹر حمیرا طارق نے میڈیا نمائندگان سے گفتگو کرتے ہوئے اس عزم کا اعادہ کیا کہ جماعت اسلامی ہر محاذ پر امت مسلمہ کے اتحاد، مظلوموں کی حمایت اور اسلامی اقدار کے تحفظ کے لیے اپنی جدوجہد جاری رکھے گی۔