کوئٹہ اور تربت میں 21نئی سبز و گلابی بسیں عوام کیلئےتیار، جلد سڑکوں پر رواں دواں ہوں گی،محمد حیات کاکڑ

کوئٹہ:وزیراعلی بلوچستان میر سرفراز بگٹی کی خصوصی ہدایات پر صوبائی حکومت نے کوئٹہ اور تربت کے شہریوں کے لیے جدید طرز کی 21 نئی بسیں خرید لی ہیں، جنہیں جلد عوام کے لیے چلایا جائے گا۔ ان میں سے 17 بسیں کوئٹہ اور 4 بسیں تربت کے شہریوں کے لیے مختص کی گئی ہیں۔سیکریٹری ٹرانسپورٹ محمد حیات کاکڑ کے مطابق کوئٹہ میں خواتین کے لیے خصوصی طور پر 5 پنک بسیں مختص کی گئی ہیں، جبکہ 12 گرین بسیں مختلف روٹس پر چلیں گی۔ انہوں نے بتایا کہ بسوں کی انسپیکشن اور شپمنٹ کا عمل مکمل ہو چکا ہے اور جلد ان کا آغاز کر دیا جائے گا۔ان کے بقول اس منصوبے کے تحت شہریوں کو محفوظ، آرام دہ اور باوقار سفری سہولت میسر آئے گی، جبکہ روزگار کے نئے مواقع بھی پیدا ہوں گے۔ توقع ہے کہ بسوں کے آغاز کے بعد روزانہ تقریبا 40 سے 50 ہزار مسافر استفادہ حاصل کر سکیں گے۔سیکریٹری ٹرانسپورٹ نے کہا کہ حکومت بلوچستان کا مقصد شہریوں کو جدید اور معیاری ٹرانسپورٹ فراہم کرنا ہے تاکہ عوام کے لیے سہولت اور سہل سفری ماحول یقینی بنایا جا سکے۔