مولانا فضل الرحمان نے قومی اسمبلی اور سینیٹ میں اپوزیشن لیڈرز کیلئے پی ٹی آئی کی حمایت کردی

اسلام آباد :جمعیت علماء اسلام ف کے سربراہ مولانا فضل الرحمان نے قومی اسمبلی اور سینیٹ میں اپوزیشن لیڈرز کے لئے پاکستان تحریک انصاف کی حمایت کردی۔سما ٹی وی کے مطابق ذرائع کا کہنا ہے کہ قومی اسمبلی اور سینیٹ میں اپوزیشن لیڈرز کی نامزدگی کے لیے سیاسی رابطے تیز ہوگئے جبکہ تحریک انصاف کے وفد نے گزشتہ ایک ہفتے کے دوران جے یو آئی کے سربراہ مولانا فضل الرحمان سے 2 تفصیلی نشستیں کی ہیں جن میں اہم قومی، سیاسی اور پارلیمانی امور پر بات چیت ہوئی۔ذرائع کا کہنا ہے کہ مولانا فضل الرحمان نے قومی اسمبلی اور سینیٹ میں اپوزیشن لیڈر کے لیے پی ٹی آئی کی حمایت کر دی ہے۔مولانا فضل الرحمان کا موقف ہے کہ دونوں ایوانوں میں اپوزیشن لیڈر پی ٹی آئی کا حق ہے اور وہ پارلیمان میں اپوزیشن کو متحد دیکھنا چاہتے ہیں۔ان کا کہنا ہے کہ ملک کو درپیش بحرانوں سے نکلنے کے لیے گرینڈ ڈائیلاگ وقت کی اہم ضرورت ہے۔