وفاقی وزارتوں اور اداروں میں رائٹ سائزنگ،11 ہزار 877 آسامیاں ختم

اسلام آباد(ڈیلی گرین گوادر)قومی اسمبلی میں وفاقی وزارتوں اور ماتحت اداروں میں رائٹ سائزنگ کے تحت ختم کی گئی آسامیوں کی تفصیلات پیش کر دی گئی ہیں۔وزارت کابینہ ڈویژن کی جانب سے پیش کردہ دستاویزات کے مطابق گریڈ 1 سے 22 تک مجموعی طور پر 11 ہزار 877 آسامیاں ختم کی گئی ہیں۔

دستاویزات کے مطابق گریڈ 19 سے 22 کی 113 آسامیاں ختم کی گئیں، جبکہ گریڈ 1 سے 18 کی 11 ہزار 764 آسامیاں بھی رائٹ سائزنگ پالیسی کے تحت ختم کی گئیں۔سب سے زیادہ متاثرہ آسامیاں گریڈ 1 سے 4 کے درجہ چہارم کے ملازمین کی ہیں، جن میں 5 ہزار سے زائد آسامیاں ختم کی گئی ہیں۔