بلوچستان کی ترقی کیلئے تمام اداروں میں ہم آہنگی ناگزیر ہے،سیدال خان ناصر

کوئٹہ(ڈیلی گرین گوادر)قائم مقام چیئرمین سینیٹ سیدال خان ناصر سے چیف سیکرٹری صوبہ بلوچستان شکیل قادر خان نے کوئٹہ میں ملاقات کی۔ملاقات میں صوبہ بلوچستان کی ترقی، امن و امان اور جاری ترقیاتی منصوبوں پر تفصیلی تبادلہ خیال کیا گیا۔قائم مقام چیئرمین سینیٹ سیدال خان نے کہا کہ بلوچستان کی ترقی حکومت کی اولین ترجیح ہے، اور وزیراعظم پاکستان شہباز شریف خود صوبے کے ترقیاتی منصوبوں کی نگرانی کر رہے ہیں۔ انہوں نے کہا کہ وزیراعظم بلوچستان کے مسائل کو ترجیحی بنیادوں پر حل کرنا چاہتے ہیں اور ترقیاتی منصوبوں کے لیے فنڈز کے اجرا میں تیزی لائی جا رہی ہے۔سیدال خان نے کہا کہ وزیراعظم پاکستان بلوچستان میں جاری ترقیاتی منصوبوں کی جلد تکمیل کے خواہاں ہیں اور وہ صوبے کے عوام سے خصوصی محبت بھی کرتے ہیں۔ انہوں نے مزید کہا کہ بلوچستان کے نوجوانوں کے لیے روزگار کے مزید مواقع پیدا کیے جائیں گے اور جدید مہارتوں کی فراہمی وقت کی ضرورت ہے۔قائم مقام چیئرمین سینیٹ سیدال خان کا مزید کہنا تھا کہ بلوچستان کی ترقی کے لیے تمام اداروں میں ہم آہنگی ناگزیر ہے اور صوبے کے عوام کو قومی ترقی کے مرکزی دھارے میں شامل کیا جائے گا۔ سیدال خان نے کہا کہ بلوچستان کی پسماندگی کو دور کرنے کے لیے سب کو مل کر کام کرنا ہوگا اور حکومت صوبے کے عوام کا معیارِ زندگی بلند کرنے کے لیے پرعزم ہے۔ملاقات میں صوبہ بلوچستان میں ترقیاتی منصوبوں کی جلد تکمیل اور فنڈز کے بروقت اجرا پر بھی تبادلہ خیال کیا گیا۔ قائم مقام چیئرمین سینیٹ سیدال خان نے کہا کہ بلوچستان کے مسائل کے حل کے لیے سنجیدہ اقدامات کیے جا رہے ہیں۔قائم مقام چیئرمین سینیٹ نے اس عزم کا اظہار کیا کہ تمام وسائل بروئے کار لا کر بلوچستان کو ایک خوشحال صوبہ بنایا جائے گا اور ترقیاتی منصوبوں کی بروقت تکمیل کو یقینی بنایا جائے گا۔