اہل غزہ نے اللہ کی تائید و نصرت سے تاریخ ساز کامیابی حاصل کی،ڈاکٹر حمیرا طارق

لاہور(ڈیلی گرین گوادر)حلقہ خواتین جماعت اسلامی پاکستان کی سیکرٹری جنرل ڈاکٹر حمیرا طارق ،ڈپٹی سیکرٹریز جنرل ڈاکٹر سمیحہ راحیل قاضی ،ثمینہ سعید ڈاکٹرزبیدہ جبیں صدر وسطی پنجاب نازیہ توحید ،صدرلاہورعظمی عمران نےمشترکہ بیان میں کہا ہے کہ حماس نے ایک بار پھر ثابت کر دیا کہ ایمان، قربانی، اور صبر کے ذریعے بڑی سے بڑی طاقتوں کو شکست دی جا سکتی ہے۔ حالیہ جنگ نے دنیا کو یہ پیغام دیا کہ ظلم کے خلاف ڈٹ جانے والے ہمیشہ سرخرو ہوتے ہیں، جبکہ ظالم ہمیشہ رسوا اور ناکام رہتا ہے۔ انہوں نے کہا کہ غزہ جنگ بندی پر 17جنوری بروز جمعہ المبارک حلقہ خواتین جماعت اسلامی پاکستان ملک گیر یوم تشکر منایاگیا جس میں رب کے حضور سجدہ ریزی ، دعائیں اور فلسطینی مجاہدین کی جرآت و استقامت کو خراج تحسین پیش کیا گیا۔ انہوں نے کہا کہ 47 ہزار فلسطینی شہداء کا خون رنگ لائے گا۔اور فلسطین ضرور آزاد ہو کر رہے گا۔ انہوں نے کہا کہ آج اہل غزہ سرخرو ہو گئے ۔اہل غزہ نے اپنی جرآت و بہادری اور صبر سے اسرائیل کی دفاعی و ملٹری حکمت عملی کو نا کام کر دکھایا – اسماعیل ہنیہ اور یحیی سنوار کا مشن جاری رہے گا۔ اور بیت المقدس کی آزادی تک تحریک مزاحمت جاری رہے گی۔