اسپیکر قومی اسمبلی کو عادل بازئی، الیاس چوہدری کیخلاف ریفرنس موصول

اسلام آباد(ڈیلی گرین گوادر)اسپیکر قومی اسمبلی کو اراکین اسمبلی عادل بازئی اور الیاس محمد چوہدری کیخلاف ریفرنسز موصول ہوگئے۔ذرائع کے مطابق عادل خان بازئی کےخلاف نواز شریف اور الیاس محمد چوہدری کیخلاف ریفرنس ق لیگ کی طرف سے دائر کیا گیا ہے۔

ریفرنسز میں کہا گیا ہے کہ ممبران نے بجٹ سیشن کے دوران پارٹی ڈائریکشنز کی خلاف ورزی کی، ان کے خلاف فوری کارروائی کی جائے، دونوں ارکان حکومتی بینچز سے اٹھ کر اپوزیشن بینچز پر بیٹھ گئے تھے۔عادل خان بازئی قومی اسمبلی کے حلقہ 262 (کوئٹہ -1) اور الیاس محمد چوہدری حلقہ 62 (گجرات ) سے قومی اسمبلی کے رکن منتخب ہوئے ہیں۔

ریفرنسز کے متن میں کہا گیا کہ مروجہ قوانین کے مطابق تمام ممبران پارٹی گائیڈ لائنز کو فالو کرنے کے پابند ہیں، ریفرنسز میں ممبران کے خلاف فوری کارروائی کی استدعا کی گئی ہے۔ذرائع کا کہنا ہے کہ مسلم لیگ ق کے رکن قومی اسمبلی کے خلاف ریفرنس چوہدری شجاعت نے بھیجا، الیاس محمد چوہدری آزاد حیثیت میں جیتنے کے بعد مسلم لیگ ق میں شامل ہوگئے تھے، جبکہ عادل خان بازائی آزاد حیثیت میں جیتنے کے بعد مسلم لیگ ن میں شامل ہوئے تھے۔