ہرنائی کے پہاڑی علاقوں میں بارش سے سیلاب کا خطرہ، سڑکیں بند، ریلوے سروس معطل

ہرنائی(ڈیلی گرین گوادر)گزشتہ شب ہرنائی کے پہاڑی علاقوں میں موسلا دھار بارش کے نتیجے میں سناڑی اور اسپن تنگی کے درمیان ٹریفک شدید متاثر ہوئی ہے۔ لیویز کنٹرول روم نے بتایا ہے کہ ریلوے ٹریک بارش کے پانی میں بہہ جانے کے باعث ہرنائی سبی ریل سروس معطل ہوگئی ہے۔

بارشوں اور سیلابی ریلوں کے باعث ہرنائی سنجاوی روڈ دوسرے روز بھی بند ہے۔ 24 گھنٹے گزرنے کے باوجود بڑی گاڑیوں کی آمد و رفت بحال نہیں ہوسکی ہے۔محکمہ آب پاشی کے حکام نے بتایا ہے کہ دریائے ناڑی میں سیلابی صورتِ حال پیدا ہوچکی ہے۔ پانی کا بہاؤ 47 ہزار کیوسک ہے۔ اس حوالے سے مقامی انتظامیہ احتیاطی اقدامات کر رہی ہے۔ لوگوں سے کہا گیا ہے کہ محفوظ مقامات پر منتقل ہوجائیں۔