امن کیلئے پاک فوج کی لازوال قربانیوں کو فراموش نہیں کیا جاسکتا ہے،میرضیاءلانگو

کوئٹہ(ڈیلی گرین گوادر)صوبائی وزیرداخلہ میرضیااللہ لانگو نے کہا ہے کہ امن کے لئے پاک فوج کی لازوال قربانیوں کو فراموش نہیں کیا جاسکتا ہے پوری قوم دہشتگردی کے اس ناسور کے خاتمے کیلئے اپنی سکیورٹی فورسز کے شانہ بشانہ کھڑی ہے۔ یہ بات انہوں نے ژوب کے علاقے سمبازہ میں دہشت گردوں کے خلاف کامیاب آپریشن پر خراج تحسین پیش کر تے ہوئے کہی، وزیرداخلہ میرضیااللہ لانگو نے آپریشن کے دوران بہادر سپوت میجربابرخان کی شہادت پر افسوس کا اظہاراور خراج عقیدت پیش کر تے ہوئے کہا کہ ہماری سکیورٹی فورسز قوم کے شانہ بشانہ بلوچستان کے امن، استحکام اور ترقی کو سبوتاژکرنے کی کوششوں کو ناکام بنانے کے لئے پرعزم ہیں سیکورٹی فورسز کی قربانیوں کے بدولت ہم اپنے گھروں میں چھین کی نیند سوتے ہیں دشمن قوتوں کی یہی سازش ہے کہ پاکستان اور بلوچستان کی ترقی وخوشحالی کو روکنا ہے۔ انہوں نے کہاکہ ایسے بزدلانہ کارروائیوں سے ہمارے سیکورٹی فورسز کے حوصلے کبھی پست نہیں ہونگے امن وخوشحالی کی بحالی کے لئے پوری قوم اور سیکورٹی فورسز کے حوصلے پہاڑکی چٹانوں کی مانند مضبوط ہے۔