پنجاب میں شہریوں کو سہولتیں فراہم کرنے کیلئے دستک ایپ لانچ

لاہور(ڈیلی گرین گوادر)وزیر اعلیٰ پنجاب مریم نواز نے گھر تک سروسز کی فراہمی کے لیے دستک پروگرام شروع کرنے کا فیصلہ کیا ہے۔

وزیراعلیٰ پنجاب مریم نوازکی زیرصدارت دستک پروگرام کا جائزہ اجلاس ہوا جس میں مریم نواز نے گھر تک سروسز فراہم کرنے کے لیے ایپ اور کال سروس شروع کرنے کی ہدایت کی۔وزیراعلیٰ نے دستک پروگرام کے لیے رائیڈرز کی فوری رجسٹریشن اور ٹریننگ شروع کرنےکی ہدایت کرتے ہوئے کہا کہ پنجاب حکومت عوام کے لیے سہولت اور گڈگورننس ہرحال میں یقینی بنائےگی۔

اجلاس میں وزیراعلیٰ پنجاب کو بتایا گیا کہ پروگرام کے پہلے مرحلے میں لاہورکے عوام کوان کی دہلیز پر 10 سروسزدی جارہی ہیں، لاہور کے شہری پیدائشی سرٹیفکیٹ، ڈیتھ سرٹیفکیٹ، میرج سرٹیفکیٹ، طلاق سرٹیفکیٹ گھر کی دہلیز پر حاصل کرسکیں گے جبکہ ان سروسز میں ڈومیسائل، ای اسٹیمپ، وہیکل رجسٹریشن، وہیکل ٹرانسفر، ٹوکن ٹیکس اور پراپرٹی ٹیکس سروس بھی شامل ہے۔اجلاس میں مزید بتایا گیا کہ یہ پروگرام دو مرحلوں پر مشتمل ہوگا اور دوسرے مرحلے میں بھی شہری سہولیات گھر کی دہلیز پر حاصل کرسکیں گے۔

دوسرے مرحلے میں شہریوں کو پولیس ویری فکیشن، لرنرڈرائیونگ لائسنس، ڈرائیونگ لائسنس کی تجدید، ایف آئی آر کاپی، ڈپلیکیٹ ڈرائیونگ لائسنس اور کرایہ دار رجسٹریشن کی سہولیات دہلیز پر ملیں گی۔کم آمدن افراد کے لیے ایک لاکھ گھروں کے پراجیکٹ کاجائزہ لیا گیا جبکہ وزیراعلیٰ پنجاب نے پنجاب کے 6 شہروں میں فوری سائٹ سلیکشن کی ہدایت کردی۔

مریم نواز نے طلباء کے لیے مجوزہ الیکٹرک اور پیٹرول بائیکس کا معائنہ کیا، پیٹرول بائیک کی ماہانہ قسط 5 ہزار، الیکٹرک بائیک کی قسط 10ہزار سے کم ہوگی۔مریم نواز کا کہنا تھا کہ 20 ہزار بائیکس کا منصوبہ طلباء کی زندگی میں آسانیاں پیدا کرے گا۔