اوتھل میں پو لیس کی دو مختلف کارروائیوں میں 2موٹر سائیکل چور گرفتار،موٹر سائیکلیں برآمد

اوتھل (ڈیلی گرین گوادر) اوتھل میں پو لیس کی دو مختلف کارروائیوں میں دو موٹر سائیکل چور گرفتار، تین چوری شدہ موٹر سائیکلیں برآمد،دیگر مختلف کاروائیوں میں 18 کلو چرس برآمد،دومنشیات فروش گرفتار۔لسبیلہ پولیس کے ترجمان کے پریس ریلیز کے مطابق ایس ایس پی لسبیلہ کیپٹن (ر) نوید عالم کی خصوصی ہدایت پر اوتھل پولیس نے کامیاب کارروائی عمل میں لاتے ہوئے موٹر سائیکل چوری کے مقدمات نمبر 02/2024, 03/2024, 04/2024 بجرم 381 اے،34 ت پ تھانہ اوتھل میں ملوث مطلوب ملزمان حبیب اللہ ولد ربنواز، عرفان ولد اللہ ڈنہ قوم صابرہ ساکنان کھیر والی گولائی اوتھل کو انتہائی پیشہ ورانہ صلاحیتوں کو بروئے کار لاتے ہوئے گرفتار کرکے ملزمان کے قبضہ سے اوتھل کے مختلف مقامات سے چوری شدہ تین یونیک موٹر سائیکلز کو برآمد کر لیا۔اوتھل پولیس نے گرفتار ملزمان سے مزید تفتیش شروع کردی ہے۔جبکہ ایس ایچ او تھل جان محمد جاموٹ نے دو مختلف کاروائیوں کے دوران اوتھل میں گریڈ اسٹیشن اوتھل کے مقام سے منشیات فروش گھنور خان ولد محمد موسیٰ سکنہ نوشیروفیروز سندھ حال آہورہ اوتھل کو گرفتار کرکے ملزم کے قبضہ سے 08 کلو 400 گرام چرس برآمد کیا جبکہ دوسری کارروائی میں یاماہا چوک اوتھل کے مقام سے منشیات فروش گلزارِ ولد سومر خان سکنہ نوشیروفیروز سندھ حال آہورہ اوتھل کو گرفتار کرکے ملزم کے قبضہ سے 09 کلو 600 گرام چرس برآمد کرلیا۔اوتھل پولیس نے دونوں گرفتار منشیات فروشوں کے خلاف نارکوٹکس ایکٹ کے تحت علیحدہ علیحدہ مقدمات درج کرکے مزید تفتیش شروع کردی ہے۔