اعظم نذیرتارڑ قائمہ کمیٹی پاور کے نئے چئیرمین مقرر،سینیٹر سیف اللہ ابڑو کو ہٹا دیا گیا

اسلام آباد(ڈیلی گرین گوادر) سینیٹ قائمہ کمیٹی برائے توانائی کے چیئرمین سیف اللہ ابڑو کو عہدے سے ہٹا دیا گیا۔سینیٹ کی قائمہ کمیٹی برائے توانائی کا اجلاس ہوا جس میں سینیٹر سیف اللہ ابڑو کو کمیٹی چیئرمین کے عہدے سے ہٹا کر مسلم لیگ ن کے سینیٹر اعظم نذیر تارڑ کو کمیٹی کا نیا چیئرمین مقرر کر دیا گیا۔

اجلاس میں سینیٹر بہرمند تنگی، سینیٹر منظور کاکڑ نے اعظم نذیر تارڑ کے حق میں ووٹ دیا، سینیٹر ثناء جمالی، سینیٹر دلاور خان بھی اعظم نذیر تارڑ کے حق میں رہے۔ذرائع کے مطابق سینیٹر سیف اللہ نیازی، سینیٹر فدا محمد، سینیٹر ہدایت اللہ، سیف اللہ ابڑو کے حق میں رہے۔ذرائع کا کہنا ہے کہ سینیٹ کی قائمہ کمیٹی کا اجلاس چیئرمین سینیٹ نے بلایا تھا۔