نگران وزیر داخلہ سے چینی سفیر کی ملاقات، سکیورٹی کے شعبے میں تعاون بڑھانے پر اتفاق

اسلام آباد(ڈیلی گرین گوادر) نگران وزیر داخلہ سرفراز احمد بگٹی سے چین کے سفیر جیانگ ژائی ڈانگ نے ملاقات کی، ملاقات میں دوطرفہ تعلقات سمیت باہمی دلچسپی کے امور پر تبادلہ خیال کیا گیا۔

سرفراز بگٹی نے کہا کہ پاکستان اور چین کے درمیان کئی دہائیوں پر مشتمل دوستی دنیا بھر کے لئے مثال ہے، وزیراعظم انوارالحق کاکڑ نے چین کا کامیاب دورہ کیا جس سے سکیورٹی سمیت مختلف شعبوں میں تعاون مزید مضبوط ہوگا، اگلا ہدف دورے کے دوران کئے گئے معاہدوں کو عملی جامہ پہنانا ہے۔

نگران وزیرداخلہ نے کہا کہ چینی صدر شی جن پنگ کا گلوبل سکیورٹی انیشیٹیو قابل ستائش ہے، گلوبل سکیورٹی کو بڑھانے کیلئے پاکستان ہر قسم کے بین الاقوامی تعاون میں فعال کردار ادا کرنے کو تیار ہے، چینی شہریوں کی سکیورٹی کو یقینی بنانے کیلئے ہر ممکن اقدامات کئے گئے ہیں۔

چینی سفیر نے چینی باشندوں کو ہر ممکن سکیورٹی فراہم کرنے پر وزیر داخلہ کا شکریہ ادا کیا، سرفراز بگٹی نے کہا کہ دہشتگردی ایک چیلنج ہے، ہم نے اسے پہلے بھی شکست دی ہے، اس مرتبہ بھی مکمل خاتمہ کریں گے۔
چینی سفیر نے دہشت گردی کے خلاف جنگ میں پاکستان کے کردار کو سراہا، ملاقات میں سکیورٹی کے شعبے میں تعاون کو مزید آگے بڑھانے پر اتفاق ہوا۔