کوئٹہ میں پیپلز پارٹی کے یوم تاسیس کا جلسہ عظیم الشان اور تاریخی ہوگا،فریال تالپور

کراچی(ڈیلی گرین گوادر) پاکستان پیپلز پارٹی کی مرکزی شعبہ خواتین کی صدر فریال تالپور نے کہاہے کہ ملک بھر کی طرح بلوچستان کے عوام کی امیدوں کا محور اور مرکز بلاول بھٹو زرداری ہیں،آئندہ عام انتخابات میں پاکستان پیپلز پارٹی بلوچستان سے بھی صوبے کی سب سے بڑی اور نمائندہ جماعت بن کر ابھرے گی۔ یہ بات انہوں نے جمعہ کو "زرداری ہاوَس کراچی "میں منعقد ہ اجلاس سے خطاب کر تے ہوئے کہی،اجلاس میں پی پی پی بلوچستان کے صدر میر چنگیز جمالی، جنرل سیکر ٹری روزی خان کاکڑ، سیکرٹری اطلاعات سربلند خان جوگیزئی، سابق وزیر اعلیٰ بلو چستان و چیف آف جھالاوان نواب ثنااللہ خان زہری، لیفٹیننٹ جنرل ریٹائرڈ عبدالقادر بلوچ،میر صادق عمرانی، علی مدد جتک، صابر بلوچ، ملک زیشان حسین،قاسم اچکزئی، نور الدین کاکڑ، نصیب اللہ شاہوانی،سردار عمران،ریاض شاہوانی، غزالہ گولہ، زرینہ بلوچ، حاجی خان محمد باریچ، حیات خان اچکزئی،عین الدین کاکڑ اور اعجاز بلوچ،ربانی خلجی نے شرکت کی۔ اجلاس میں پارٹی کے یوم تاسیس کے موقع پر کوئٹہ میں جلسہ عام کی تیاریوں کا جائزہ اور بلوچستان کی سیاسی و تنظیمی صورتحال اور آئندہ عام انتخابات کے لئے پارٹی کی حکمت عملی پر تبادلہ خیال کیا گیا۔اجلاس سے خطاب کر تے ہوئے فریال تالپور نے کہا کہ بلوچستان کے عوام نے ہمیشہ پاکستان پیپلز پارٹی کا ساتھ دیا ہے لیکن بدقسمتی سے پی پی پی کا مینڈیٹ چرایا جاتا رہاآئندہ عام انتخابات میں بلوچستان کے عوام اپنے مینڈیٹ کی حفاظت کرے گی، 8 فروری پیپلز پارٹی کی فتح کا دن ہوگاآئندہ عام الیکشن کے نتیجے میں وزیراعظم چیئرمین بلاول بھٹو زرداری ہوگا اور بلوچستان کا وزیراعلیٰ جیالا ہوگا۔انہوں نے کہاکہ پاکستان پیپلز پارٹی نے ملک بھر کی طرح بلوچستان کے عوام کی بھی خدمت اوران کے حقوق کی حفاظت کی ہے صدر آصف علی زرداری نے اپنے دورِ صدارت میں آغاز بلوچستان پروگرام کا تحفہ دیااٹھارویں ترمیم کے صوبوں کو اپنے وسائل کا مالک بنانا اور متفقہ این ایف سی ایوارڈ بھی صدر آصف علی زرداری کے تحفے ہیں۔ انہوں نے کہاکہ چیئرمین بلاول بھٹو زرداری ملک کے وزیراعظم بنیں گے تو پورے ملک کی طرح بلوچستان کے نوجوانوں کو روزگار دیں گے پاکستان پیپلز پارٹی کی قیادت جھوٹے وعدے نہیں کرتی وہ جو وعدہ کرتے ہیں نبھاتے بھی ہیں۔ اس موقع پر پی پی پی بلوچستان کے رہنما ؤں نے کہا کہ یوم تاسیس کی مرکزی تقریب کے کوئٹہ میں انعقاد نے بلوچستان بھر کے جیالوں میں نیا جوش و ولولہ پیدا کیا ہے کوئٹہ میں پیپلز پارٹی کے یوم تاسیس کا جلسہ عظیم الشان اور تاریخی ہوگا۔