افغانستان جانے والا کنٹینر حادثے کا شکار، 2 افراد جاں بحق، 25 زخمی
راولپنڈی (ڈیلی گرین گوادر)افغانستان جانے والا کنٹینر ہٹیاں جی ٹی روڈ پر تیز رفتاری کے دوران ٹائر پھٹنے کے باعث الٹ گیا۔حادثے میں 2 افراد جاں بحق اور 25 زخمی ہوگئے ہیں، لاشوں اور زخمیوں کو تحصیل اسپتال حضرو منتقل کردیا گیا ہے۔
افغانستان جانے والے کنٹینر کا، جس میں کئی خاندان بمعہ سامان سوار تھے، ہٹیاں کے مقام پر تیز رفتاری کے دوران ٹائر پھٹ گیا، جس کی وجہ سے ٹرک فٹ پاتھ پر چڑھ جانے کے بعد بڑے پل کے ساتھ ٹکرا کر الٹ گیا۔حادثے میں متعدد افراد زخمی ہوگئے، اطلاع ملنے پر ریسکیو 1122 کی 4 ایمبولینسز اور 2 ریسکیو وہیکلز جائے وقوع پہنچ گئیں۔
ریسکیو اہلکاروں نے مقامی افراد کی مدد سے لوگوں کو نکال کر طبی امداد دینے کے بعد تحصیل ہسپتال حضرو منتقل کر دیا۔حادثے میں 2 افراد جاں بحق ہوئے جبکہ بچوں اور خواتین سمیت 25 افراد زخمی ہوئے جن میں سے 4 افراد کو ریسکیو ایمبولینس میں راولپنڈی ریفر کردیا گیا۔
