بیگم نصرت بھٹو کی سیاسی تاریخ میں مثال نہیں ملتی مرحومہ کی خدمات کو ہمیشہ سنہرے حروف میں یاد رکھا جائے گا، غزالہ گولہ
کوئٹہ(ڈیلی گرین گوادر) پاکستان پیپلز پارٹی خواتین ونگ کی رہنماوں نے مادر جمہوریت بیگم نصرت بھٹو کو انکی برسی پر خراج عقیدت پیش کرتے ہوئے کہاہے کہ بیگم نصرت بھٹو نے ملک اورقوم کیلئے جو قربانیاں دی اسکی سیاسی تاریخ میں مثال نہیں ملتی مرحومہ کی خدمات کو ہمیشہ سنہرے حروف میں یاد رکھا جائے گا۔ یہ بات پاکستان پیپلز پارٹی خواتین ونگ کی صوبائی صدر وسابق صوبائی وزیر غزالہ گولہ، جنرل سیکرٹری زرینہ زہری، سیکرٹری اطلاعات کرن بلوچ نے مادر جمہوریت بیگم نصرت بھٹو کی 12برسی کے حوالے سے منعقدہ تقریب سے خطاب کرتے ہوئے کہی اس موقع پر محترمہ بیگم نصرت بھٹو کی روح کے ایصال ثواب کیلئے فاتحہ خوانی بھی کی گئی۔ مقررین نے کہا کہ مادر جمہوریت بیگم نصرت بھٹو نے آئین اور جمہوریت کی خاطر قید و بند کی صعوبتیں برداشت کیں مگر پاکستان پیپلز پارٹی کے پرچم کو بلند رکھا اور آئین شکن اور جمہوریت دشمنوں کے خلاف مردانہ وار میدان عمل میں نکلیں بیگم نصرت بھٹو نے آمریت کے خلاف دلیرانہ جدوجہد پر مادر جمہوریت کا خطاب حاصل کیا۔۔انہوں نے کہا کہ شہید ذوالفقار علی بھٹو کے عدالتی قتل کے بعد بیگم نصرت بھٹو نے ایم آر ڈی کے پلیٹ فارم سے جمہوریت اور آئین کی بحالی کیلئے تاریخی تحریک کی قیادت کی محترمہ نے جن مقاصد کی خاطر بے مثال قربانیاں دی ہیں ان مقاصد کو پورا کرنے کیلئے پاکستان پیپلزپارٹی کی جدوجہد جاری ہے۔انہوں نے کہا کہ ملک سے آمریت کے خاتمے اور جمہوریت کیلئے مادر جمہوریت بیگم نصرت بھٹو ک خڈمات ہمارے لئے مشعل راہ ہیں اورانکی خد مات کو ہمیشہ سنہرے حروف میں یاد رکھا جائے گا۔
