کراچی، برنس روڈ پر ملزمان کی لوٹ مار، کار سوار کی فائرنگ سے 2 ڈاکو ہلاک

کراچی(ڈیلی گرین گوادر) کراچی کے علاقے برنس روڈ پر لوٹ مار کی واردات کے دوران کار سوار کی فائرنگ سے دو مبینہ ڈاکو ہلاک ہو گئے جبکہ ایک کو زخمی حالت میں گرفتار کر لیا گیا۔پولیس کے مطابق ملزمان برنس روڈ پر ایک کار سوار کو لوٹنے کی کوشش کر رہے تھے کہ کار سوار نے فائرنگ کر دی جس کے نتیجے میں تینوں زخمی ہو گئے۔

پولیس کا بتانا ہے کہ ایک ملزم اسپتال پہنچنے سے پہلے دم توڑ گیا جبکہ دو ملزمان کو سول اسپتال منتقل کیا گیا۔اس حوالے سے ڈی آئی جی ساوتھ اسد رضا کا کہنا ہے کہ تین ملزمان کار سوار شہری سے لوٹ مار کرکے فرار ہو رہے تھے کہ گشت پر مامور اہلکاروں نے شہری کے ساتھ مل کر مقابلہ کیا، مقابلے میں دو ڈاکو ہلاک ہوئے جبکہ ایک شدید زخمی حالت میں زیر علاج ہے۔

اسد رضا کا کہنا ہے کہ جامعہ کلاتھ کے قریب ملزمان کی موٹر سائیکل بھی مل گئی ہے، ہلاک اور زخمی ملزمان کی شناخت کا عمل جاری ہے۔ادھر سپر ہائی وے سبزی منڈی کے قریب مبینہ پولیس مقابلے میں 2 ملزمان کو زخمی حالت میں گرفتار کر لیا گیا۔پولیس کے مطابق ملزم حبیب اللہ اور علی سبزی منڈی جانے والے تاجروں سے لوٹ مار کرتے تھے۔