مردم شماری میں بلوچستان کے 63 لاکھ آبادی پر ڈاکہ کو ہرگز برداشت نہیں کرینگے، مولانا عبدالغفورحیدری

کو ئٹہ (ڈیلی گرین گوادر)جمعیت علماء اسلام کے مرکزی سیکرٹری جنرل سینیٹر مولانا عبدالغفورحیدری نے کہا ہے کہ مردم شماری میں بلوچستان کے 63 لاکھ آبادی پر ڈاکہ کو ہر گز برداشت نہیں کرینگے، الیکشن اپنی آئینی مدت میں ہونی چاہیے، حلقہ بندیاں الیکشن کمیشن کا کام ہے کہ وہ کس طرح انکو مینج کرتی ہے۔ یہ بات انہوں نے ہفتہ کو پارٹی رہنماؤں سے بات چیت کرتے ہوئے کہی۔انہوں نے کہا کہ جمعیت علماء اسلام کا موقف واضح ہے کہ صاف وشفاف الیکشن کیلئے ضروری ہے کہ بلوچستان کی مردم شماری کو نظر انداز نہ کیا جائے انہوں نے کہا کہ الیکشن کمیشن کا کام ہے کہ وہ صاف وشفاف الیکشن کیلئے اپنا کردار ادا کرے تاکہ 2018 کی طرح کا الیکشن نہ ہو جسکی صورت میں معاشی بدحالی، بیروزگاری اور لاقانونیت وجود میں آئی تھی۔مولانا عبدالغفورحیدری نے کہا کہ بہتر ہوگا کہ ضلع کی سطح پر چیئرمین الیکشن کمیشن کو ہی ڈی آر او بنایا جائے تاکہ نتائج بروقت مل سکے۔انہوں نے کہا کہ بلوچستان کی مردم شماری پر تمام سیاسی جماعتوں کا موقف ہے کہ 63 لاکھ کی ابادی کو کم نہ کیا جائے۔