ٹانک، فائرنگ سے پولیس کانسٹیبل جاں بحق

ٹانک(ڈیلی گرین گوادر) مسلح افراد کی بھرے بازار میں فائرنگ سے پولیس کانسٹیبل جاں بحق اور ایک شہری زخمی ہوگیا۔پولیس حکام کے مطابق فائرنگ نجی بینک کے مین گیٹ پر کی گئی ، جس کی زد میں آکر پولیس کانسٹیبل ریاض جاں بحق جب کہ ضیا الدین نامی ایک شہری زخمی ہوگیا۔ واقعے کے بعد پولیس اہل کار کی لاش اور زخمی شہری کو اسپتال منتقل کیا گیا۔اطلاع ملنے پر پولیس کی بھاری نفری جائے وقوع پر پہنچی اور شواہد جمع کرنے کے ساتھ وہاں موجود افراد سے بیان لیے۔ ملزمان کی گرفتاری کے لیے شہر کے داخلی و خارجی راستوں پر ناکے لگا کر تلاشی کا عمل شروع کردیا گیا ہے۔فائرنگ کے واقعے کے بعد تاجروں میں خوف و ہراس پھیل گیا اور انہوں نے دکانیں بند کردیں۔ پولیس نے فرار ہونے والے مسلح افراد کی تلاشی کے لیے مختلف مقامات پر سرچ آپریشن بھی شروع کردیا ہے۔پولیس کا کہنا ہے کہ ہم واقعے کو ٹارگٹ کلنگ کے تسلسل کے تناظر میں دیکھ رہے ہیں۔