جنوبی وزیرستان دہشت گردوں سے فائرنگ کے تبادلے میں فوجی جوان شہید
راولپنڈی (ڈیلی گرین گوادر) جنوبی وزیرستان کے علاقے لدھا میں سیکیورٹی فورسز اور دہشت گردوں کے درمیان فائرنگ کا تبادلے میں پاک فوج کا جوان شہید ہوگیا۔ پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے لدھا میں واقع دہشت گردوں کے ٹھکانوں کو مؤثر طریقے سے نشانہ بنایا، اس دوران مسلح افراد نے اہلکاروں پر فائرنگ کی۔
آئی ایس پی آر کے مطابق شدید فائرنگ کے تبادلے کے دوران لانس نائیک محمد صابر بہادری سے لڑتے ہوئے جام شہادت نوش کرگیا۔فوجی جوان کی شہادت کے بعد سیکیورٹی فورسز نے علاقے میں کلیئرنس آپریشن شروع کردیا تاکہ فرار ہونے والے دہشت گردوں کو گرفتار کیا جاسکے۔ آئی ایس پی آر کا کہنا ہے کہ پاکستان کی مسلح افواج دہشت گردی کی لعنت کو ختم کرنے کے لیے پرعزم ہے. ہمارے بہادر سپاہیوں کی ایسی قربانیاں ہمارے عزم کو مزید مضبوط کرتی ہیں۔
