قومی کرکٹ ٹیم نے آئی سی سی رینکنگ میں دنیا کی نمبر ون ٹیم بن کر پاکستان کا نام روشن کیا ہے، میر عبدالقدوس بزنجو

کوئٹہ(ڈیلی گرین گوادر)) وزیر اعلیٰ بلوچستان میر عبدالقدوس بزنجو نے پاکستانی کرکٹ ٹیم کو عالمی رینکنگ میں پہلی پوزیشن حاصل کرنے پر اظہار مسرت کرتے ہوئے پی سی بی کے چیئرمین نجم سیٹھی سمیت مینجمنٹ اور تمام کھلاڑیوں کو مبارکباد پیش کی ہے۔اپنے ایک تہنیتی پیغام میں وزیراعلیٰ نے کہا ہے کہ قومی کرکٹ ٹیم نے آئی سی سی رینکنگ میں دنیا کی نمبر ون ٹیم بن کر پاکستان کا نام روشن کیا ہے۔وزیراعلیٰ نے نوجوان کرکٹر بابر اعظم کو تیز ترین 5000 رنز بنانے پر بھی مبارکباد دی ہے۔وزیراعلیٰ نے کہا ہے کہ بلوچستان کے عوام کھیلوں اور خاص طور سے کر کٹ سے خصوصی محبت کرتے ہیں بلوچستان کے باصلاحیت کھلاڑی بھی قومی سطح کے مقابلوں میں بہترین کارکردگی کا مظاہرہ کر رہے ہیں خواہش ہے کہ پی سی بی بلوچستان کے نوجوان کھلاڑیوں کو قومی ٹیم میں اپنے جوہر دکھانے کا موقع دے۔وزیراعلیٰ نے قومی کرکٹ ٹیم کی مزید کامیابیوں کے لئے نیک خواہشات کا اظہار کیا ہے۔