عوام ہفتہ کو چیف جسٹس سے اظہار یکجہتی کیلئے سڑکوں پر نکلیں ، عمران خان

لاہور(ڈیلی گرین گوادر) چیئرمین تحریک انصاف عمران خان نے قوم سے ہفتہ کو چیف جسٹس سے اظہار یکجہتی کیلئے سڑکوں پر نکلنے کی اپیل کردی سابق وزیراعظم عمران خان نے اپنے ویڈیو پیغام میں کہا کہ بروز ہفتہ نماز مغرب سے ایک گھنٹہ پہلے ہر شخص اپنے گھروں، گلی، محلوں سے چیف جسٹس کے ساتھ اظہارِ یکجہتی اور آئین کی حکمرانی کے لئے باہر نکلے۔

عمران خان کا کہنا تھا کہ ہمارا ملک تاریخ کے ایک فیصلہ کن موڑ پر کھڑا ہے، پاکستان میں تاریخی مہنگائی اور بیروزگاری عروج پر ہے، ہمارے ملک پر مافیا کا قبضہ ہے۔چیئرمین پی ٹی آئی عمران خان نے مزید کہا کہ اس حکومت کو الیکشن میں شکست کا خوف ہے، حکومت پاکستان کا آئین اور سپریم کورٹ تباہ کرنے پر تلی ہوئی ہے۔

عمران خان کا کہنا تھا کہ یہ مافیا چیف جسٹس اور ججز کے خلاف پروپیگنڈہ کررہا ہے، میں قوم سے اپیل کرتا ہوں بروز ہفتہ نماز مغرب سے ایک گھنٹہ پہلے ہر شخص اپنے گھروں، گلی، محلوں سے چیف جسٹس کے ساتھ اظہارِ یکجہتی اور آئین کی حکمرانی کے لئے باہر نکلے۔