کراچی، گاڑی سے بچے کی تشدد زدہ لاش برآمد

کراچی(ڈیلی گرین گوادر) کراچی کے علاقے کورنگی نمبر تین میں سڑک کنارے کھڑی گاڑی سے بچے کی تشدد زدہ لاش ( Dead Body ) برآمد کی گئی ہے۔پولیس کے مطابق مقتول بچے کی عمر دس سال تھی۔ پولیس نے گاڑی کے مالک کو حراست میں لے کر تفتیش شروع کر دی ہے۔پولیس حکام کے مطابق مقتول بچے کے جسم پر تشدد کے نشانات ہیں، شہبہ ہے کہ بچے کو زیادتی کا نشانہ بنایا گیا۔ لاش ملنے پر لواحقین کی جانب سے شدید احتجاج بھی کیا گیا۔

بچے کے اہل خانہ کا کہنا تھا کہ ملزمان کو گرفتار کر کے انصاف فراہم کیا جائے۔ ان کا کہنا تھا کہ ہماری کسی کے ساتھ دشمنی نہیں۔ بچے کے ماموں نے بتایا کہ بچہ ذہنی طور پر معذور تھا، گرفتار شخص محلے کا رہائشی ہے، اسی نے لاش کی اطلاع دی تھی۔بچے کے والد حیدرآباد میں ملازمت کرتے ہیں۔ رپورٹ کے مطابق واقعہ کورنگی کے علاقے زمان ٹاؤن میں پیش آیا، پولیس کو لاش کی اطلاع گاڑی کے مالک نے دی۔ابتدائی تفتیش کے مطابق گاڑی کا مالک شہزاد والدہ کی دوا لینے گاڑی میں سوار ہوا تو کچھ فاصلے پر جا کر اسے پچھلی سیٹ پر لاش کی موجودگی کا پتا چلا۔ پولیس کا کہنا ہے موت کی وجہ پوسٹ مارٹم رپورٹ کے بعد معلوم ہوگی۔