پنجاب کابینہ نے اسکولوں کیلئے 25 ہزار اساتذہ بھرتی کرنےکی منظوری
لاہور (ڈیلی گرین گوادر) پنجاب کابینہ نے محکمہ اسکولز ایجوکیشن میں 25 ہزار اساتذہ بھرتی کرنےکی منظوری دے دی۔پنجاب کابینہ کے اجلاس میں وزیراعلیٰ چوہدری پرویز الہٰی کا کہنا تھا کہ اساتذہ کی بھرتی کی درخواست ملالہ یوسف زئی نے ملاقات میں کی تھی۔
کابینہ نے پنجاب حکومت کی جانب سے عام آدمی کو فری لیگل ایڈفراہم کرنےکی منظوری بھی دے دی، کابینہ نے فری لیگل ایڈکے لیے پنجاب پبلک ڈیفنڈر سروس بل 2022 کی منظوری دی۔وزیراعلیٰ کا کہنا تھا کہ کم وسائل رکھنے والے افرادکوپنجاب حکومت فری لیگل ایڈ دے گی، ایک ہزار ملازمتوں کے نئے مواقع پیدا ہوں گے، عام آدمی کو انصاف کی فراہمی یقینی بنائی جاسکےگی۔
پرویز الہٰی کا کہنا تھا کہ سولرپمپس کی فراہمی کے پروگرام سے زرعی شعبہ ترقی کرےگا، کاشت کار کوپانی کی فراہمی یقینی بنائی جاسکےگی جس سے زرعی پیداواربڑھےگی۔وزیراعلیٰ کا کہنا تھا کہ چند ماہ میں پنجاب کے سالانہ ترقیاتی پروگرام کے حجم میں 50 ارب روپےکا اضافہ کیا ہے، سالانہ ترقیاتی پروگرام کا حجم 685 ارب روپے سے 726 ارب روپے تک پہنچ چکا ہے۔
کابینہ نے پبلک سیکٹریونیورسٹیوں کے وی سیز کی معیاد کے لیے پبلک سیکٹر یونیورسٹیز ایکٹ 2022 میں ترامیم کی منظوری بھی دے دی۔پرویز الہٰی کا کہنا تھا کہ 300 ماحول دوست بسوں کی خریداری پر 15 ارب روپے خرچ ہوں گے، لاہور میں خواتین کے لیے علیحدہ بس اسٹاپ بنائیں گے، علیحدہ بسیں چلائی جائیں گی۔
