کراچی، کورنگی میں دو روز کے دوران اسٹریٹ کرائمز میں 2 نوجوان قتل

کراچی (ڈیلی گرین گوادر) کورنگی میں دو روز کے دوران اسٹریٹ کرائمز میں دو نوجوانوں کو قتل کردیا گیا۔ کراچی کے علاقے کورنگی نمبر 6 میں بدھ کے روز ڈکیتی مزاحمت کے دوران فائرنگ سے 18 سالہ نوجوان جاں بحق ہوگیا جس کی شناخت قیوم کے نام سے ہوئی۔

مقتول کے چچا عمر قریشی نے بتایاکہ ہم سبزی فروش ہیں، جس وقت واقعہ پیش آیا بھتیجا گھر سے موٹرسائیکل نکال رہا تھا کہ فائرنگ ہوئی، گولی چلنے کی آواز سن کر باہر آیا تو بھتیجا شدید زخمی تھا، میں نے اٹھانے کی کوشش کی لیکن وہ نہ اٹھا۔

دوسری جانب پولیس کے مطابق کورنگی نمبر 5 میں دو روز قبل اسٹریٹ کرائم میں زخمی ہونے والا نوجوان دم توڑگیا۔پولیس کے مطابق دو روز قبل کورنگی نمبر 5 میں ڈکیتی میں ملوث ایک ڈکیت کو علاقہ مکینوں نے مار دیا تھا جب کہ پولیس نے دوسرے ملزم کو زخمی حالت میں گرفتار کیا تھا۔