کراچی، گھر میں کھٹمل مار دوا کی گیس بھرنے سے بچی جاں بحق
کراچی(ڈیلی گرین گوادر) محمود آباد میں گھر کے اندر کھٹمل مار دوا کی گیس بھرنے سے ایک بچی جاں بحق جبکہ ماں اور چار بچوں کی حالت غیر ہوگئی۔تمام افراد کو فوری طور پر اسپتال منتقل کیا گیا ، دو بچوں کی حالت تشویشناک بتائی جاتی ہے۔گزشتہ روز محمود آباد کے علاقے اعظم بستی میں بے نظیر گرلز کالج کے قریب واقع رہائشی عمارت کے ایک فلیٹ میں گھر کے اندر گیس بھرگئی جس کے نتیجے میں ایک بچی موقع پر ہی چل بسی ، واقعے میں چار بچے اور ایک خاتون کی حالت غیر ہوگئی۔
واقعے کی اطلاع ملتے ہی پولیس اور ریسکیو ورکرز موقع پر پہنچ گئے اور ہلاک و متاثرہ افراد کو فوری طور پر جناح اسپتال منتقل کیا ، پولیس حکام کا کہنا ہے کہ مذکورہ گھر میں شہزاد نامی شخص اور اس کے اہل خانہ مقیم ہیں۔انھوں نے گزشتہ روز گھر میں کھٹمل مارنے والے گولیاں گھر میں رکھی تھیں جن کے پھٹنے کے بعد گھر میں گیس بھرگئی ، گھر میں گیس یا ہوا کے اخراج (وینٹی لیشن) کا انتظام نہ ہونے کے باعث گیس گھر سے باہر نہ نکل سکی اور گھر کے اندر ہی جمع ہوتی گئی۔
شہزاد صبح کام کاج کی غرض سے گھر سے نکل چکا تھا جبکہ اہل خانہ سورہے تھے جس پر ایک بچی چار سالہ ریچل موقع پر ہی دم توڑ گئی ، دیگر میں اس کے چار بہن بھائی کرسٹینا ، فرسٹینا ، پیٹرسن ، اسرائیل اور ان کی والدہ اسپتال میں زیر علاج ہیں۔دو بچوں کی حالت تشویشناک بتائی جاتی ہے ، پولیس حکام نے مزید بتایا کہ گھر کا مکمل طور پر معائنہ کیا گیا جبکہ خصوصی طور پر گھر کا کچن بھی چیک کیا گیا۔ابتدائی طور پر گھر میں سوئی گیس بھرنے کی اطلاع موصول ہوئی تھی تاہم سوئی گیس کے لیکیج کے کوئی شواہد نہیں ملے ، پولیس واقعے کی مزید تحقیقات کررہی ہے ۔
