بلوچستان میں بارشوں اور سیلاب کے باعث مزید 3اموات، صوبے میں مزید 2071مکانات متاثر

کوئٹہ(ڈیلی گرین گوادر) بلوچستان میں بارشوں اور سیلاب کے باعث مزید 3اموات اور 4افراد کے زخمی ہونے کی تصدیق، صوبے میں مزید 2071مکانات متاثر۔ محکمہ پی ڈی ایم اے بلوچستان کی جاری کردہ رپورٹ کے مطابق گزشتہ 24گھنٹوں کے دوران ژوب،موسیٰ خیل، بارکھان میں ایک،ایک اموات جبکہ 4افراد کے زخمی ہونے کی تصدیق ہوئی جس کے بعد اب تک ہونے والی اموات کی تعداد بڑھ کر 237جبکہ زخمیوں کی تعداد 106ہوگئی۔ رپورٹ کے مطابق گزشتہ 24گھنٹوں کے دوران صوبے میں مزید 2071مکانات سیلاب اور بارش سے متاثر ہوئے جس کے بعد اب تک مجموعی طور پر متاثر ہونے والے مکانات کی تعداد 29ہزار 818سے تجاوز کر گئی ہے رپورٹ کے مطابق صوبے میں 2لاکھ ایکڑ سے زائد زرعی اراضی بھی متاثر ہوئی ہے۔رپورٹ کے مطابق جمعرات کو مستونگ اور سبی کے متاثر علاقوں کے لئے ٹینٹ، راشن سمیت دیگر امدادی سامان روانہ کردیا گیا۔