بلوچستان میں طوفانی بارشوں کی تباہ کاریاں جاری مزید 13افراد کی اموات مجموعی تعداد 149 ہوگئی

کوئٹہ(ڈیلی گرین گوادر) بلوچستان میں طوفانی بارشوں اور سیلاب کی تباہ کاریاں جاری صوبے میں مزید 13افراد کی اموات کی تصدیق مجموعی تعداد 149ہوگئی 13975مکانات متاثر، محکمہ پی ڈی ایم اے کی جاری کردہ رپورٹ کے مطابق بلوچستان کے ضلع کوئٹہ، ژوب، پشین میں گزشتہ 24گھنٹوں کے دوران تین، تین جبکہ مستونگ میں دو، ہرنائی اور واشک میں ایک،ایک اموات کی تصدیق ہونے کے بعد اب تک ہونے والی اموات کی تعداد 149جبکہ زخمیوں کی تعداد 74ہوگئی ہے،رپورٹ کے مطابق صوبے میں متاثرہ مکانات کی مجموعی تعداد بڑھ کر 13975ہوگئی ہے جن میں سے 3556مکمل جبکہ 10429جزوی طور پر متاثر ہیں صوبے میں اب تک 1لاکھ 98ہزار 461ایکڑ زرعی زمین، 670کلو میٹر روڈ، 16پل متاثر جبکہ 23013مویشی ہلاک ہوچکے ہیں رپورٹ کے مطابق سب سے زیادہ کوئٹہ میں 20، پشین میں 15،ژوب میں 13،قلعہ سیف اللہ میں 10،کیچ میں 8،لسبیلہ میں 7اموات ہوئی ہیں